მსოფლიო ბანკმა საქართველოს ეკონომიკის ზრდის პროგნოზი გააუმჯობესა

მსოფლიო ბანკის მიერ გამოქვეყნებული დოკუმენტის „გლობალური ეკონომიკური პესპექტივის“ თანახმად ბანკმა საქართველოს 2023 წლის ეკონომიკური ზრდის პროგნოზი გაზარდა.

მსოფლიო ბანკის შეფასებით, მიმდინარე წელს ქვეყანაში 4.4%-იანი ეკონომიკური ზრდა იქნება, რაც 0.4%-ით აღემატება 2023 წლის იანვრის პროგნოზს.

რაც შეეხება 2024 წლის ეკონომიკური ზრდის პროგნოზს, მსოფლიო ბანკი უცვლელად ტოვებს და ფინანსური ინსტიტუტის პროგნოზით,  საქართველოს ეკონომიკა 2024-2025 წლებში 5%-ით გაიზრდება. 

მსოფლიო ბანკის მიერ გამოქვეყნებული დოკუმენტის “გლობალური ეკონომიკური პესპექტივის” თანახმად, ბანკმა გააუმჯობესა 2023 წლის გლობალური ეკონომიკური ზრდის პროგნოზი 2,1 პროცენტამდე იანვარში მოსალოდნელი 1,7 პროცენტის ნაცვლად. 

მსოფლიო ბანკის პროგნოზით, განვითარებულ ეკონომიკებში მშპ-ის ზრდა წელს 2022 წლის 2,6 პროცენტთან შედარებით 0,7 პროცენტამდე შენელდება. 

აშშ-ს ეკონომიკის ზრდის ტემპი წელს 1,1 პროცენტამდე შენელდება, ხოლო 2024 წელს 0,8 პროცენტამდე. ევროზონაში 2023 წელს ზრდა იქნება 0,4 პროცენტი, ( 2022 წლის 3,5 პროცენტთან შედარებით).

ეკონომისტები მიზეზად მონეტარული პოლიტიკის გამკაცრების დაგვიანებულ ეფექტსა და ელექტროენერგიის ფასების ზრდას ასახელებენ.

განვითარებადი ეკონომიკებისთვის (ჩინეთის გამოკლებით) მსოფლიო ბანკი მშპ-ს 2,9 პროცენტს პროგნოზირებს შარშანდელი 4,1 პროცენტის შემდეგ.

ჩინეთის მშპ 2023 წელს გაიზრდება 5,6 პროცენტით, ხოლო 2024 წელს - 4,6 პროცენტით, - ამბობენ ანალიტიკოსები.