კომპანი „ციმციმი“ ასორტიმენტს აფართოებს

სურნელოვანი სანთლების მწარმოებელი კომპანია Tsimtsimi • ციმციმი, რომელიც სულ რაღაც ერთი წლის წინ გამოჩნდა ბაზარზე, საკუთარ მომხმარებელს სიახლეს სთავაზობს. კომპანიამ, სანთლების ხაზს დაამატა ხელნაკეთი საპნების ხაზიც. ამის შესახებ, Business Insider Georgia-ს კომპანიის დამფუძნებელმა ნინო გუგავამ განუცხადა. მისივე თქმით, ახალმა პროდუქციამ დიდი დაინტერესება და მოწონება დაიმსახურა.

„ჩვენი კომპანია, „ციმციმი“ ზუსტად 1 წლის წინ გამოჩნდა ბაზარზე.  გამოჩენის დღიდან  ძალიან დიდი მოწონება დაიმსახურა საზოგადოების მხრიდან. სანთლებს, რომელსაც ვაწარმოებთ ძალიან სასიამოვნო არომატი აქვს და მიმაჩნია, რომ განწყობასაც აუმჯობესებს. გარდა ამისა, გვაქვს ახალი მიმართულება. სულ რაღაც ერთი თვეა რაც დავიწყეთ ხელნაკეთი საპნების დამზადება, რომელიც ასევე დიდი მოწონებით სარგებლობს მომხმარებლებში. ჩვენ ვამზადებთ საფერავის, იასამნის, იაპონური საკურას და ა.შ ხელნაკეთ საპნებს ნატურალური ინგრედიენტებით. სანთლების შემთხვევაში თუ ვიყენებთ სოიოს ცვილს, საპნების შემთხვევაში ვიყენებთ ყურძნის წიპწის ზეთს, შიის კარაქს და ვამზადებთ საპნებს, რომელიც სასარგებლოა და ძალიან დიდი მოწონებით სარგებლობს“, - ამბობს კომპანიის დამფუძნებელი ნინო გუგავა.

პროდუქციის მიმართ ინტერესი და მოთხოვნა მზარდია, როგორც ქართველების, ასევე უცხოელების მხრიდან.

„ჩვენ ვინაიდან არ გვქონია დიდი მარკეტინგული ბიუჯეტი ძალიან მცირე და მწირი რესურსებით ვახერხებთ ცნობადობის გაზრდას. გაყიდვების ტენდენცია ცალსახად მზარდია. უცხოლებს ძალიან მოსწონთ ჩვენი პროდუქცია და ძალიან ბევრი გვყავს ისეთი მომხმრებელი, რომელიც განმეორებით არაერთხელ ახდენს შეძენას. ქართველებს რაც შეეხება მათი მხრიდანაც ძალიან დიდი დაინტერესებაა. ამასთან, პროდუქცია ერთმანეთთან კომბინაციაში დავამზადეთ, მაგალითად იასამნის სანთელი და იასამნის საპონი, საფერავის სანთელი და საფერავის საპონი. ყველა პროდუქტი ხელნაკეთია. ჩვენ არ გვაქვს დიდი ქარხანა ვართ საწარმოს დონეზე და ამის კვალობაზე შემიძლია თამამად ვთქვა, რომ ძალიან კარგი გაყიდვები გვაქვს. იმ პირობებთან მიმართებაში, რასაც ჩვენ რეკლამაში ვახარჯავთ და როგორი წარმადობაც გვაქვს. სხვათაშორის, ერთ-ერთმა ბანკმა საახალწლოდ და 8 მარტისთვის შეგვიკვეთა კორპორატიული საჩუქრებისთვის, რაც იმდენად დიდი შეკვეთა იყო რომ ვერ ავუდიოდით კეთებას და კომპანიის თითოეული თანამშრომელი ვიყავით ჩართული ამ შეკვეთის დამზადებაში“, - აცხადებს კომპანიის დამფუძნებელი.

„ციმციმს“ არაერთი კონკურენტული უპირატესობა გააჩნია, ყველაზე მთავარია კი ქართული წარმოებაა.

„პირველ რიგში, კომპანიის კონკურენტულ უპირატესობად მივიჩნავ იმას რომ არის ქართული წარმოება. მეორე და ერთ-ერთი მთვარი კონკურენტული უპირატესობა არის ის, რომ საქმეს ვაკეთებთ გულით. თითოეულ სანთელს, თითოეულ საპონს ჩვენი საკუთარი ხელებით, არაფერს არ "ვაფუჩეჩებთ" და ამას მომხმარებელი აუცილებლად გრძნობს და ხედავს, რომ სიყვარულით და გულით არის ყველაფერი გაკეთებული. გარდა ამისა, უპირატესობა არის ის რომ ჩვენ ღვინოს, დამატებით დატვირთვას ვძენთ - ეს კი  ტურისტებს ძალიან მოსწონთ. ხელნაკეთს თავისი ხიბლი აქვს “, - აღნიშნავს კომპანიის დამფუძნებელი ნინო გუგავა.

ცნობისთვის, სანამ  კომპანია ბაზარზე დაიწყებდა ოპერირებას დაახლოებით 6 თვე ახორციელებდა რეცეპტების შემუშავების, სწავლების, დატესტვის პროცესებს. „ციმციმი“ მუშაობს ნატურალური, ბუნებრივი ინგრედიენტებით და გამოირჩევა განსხვავებული, სასიამოვნო სურნელით.