როგორია ქვეყნის ბიზნეს გარემო და საინვესტიციო მიმზიდველობა - შოთა ბერეკაშვილის შეფასება

ამა თუ იმ ქვეყნის ბიზნეს გარემოს შეფასების ორი კრიტერიუმი არსებობს და პირველი კრიტერიუმი არის ის, რომ ქვეყანას რა სახის საგადასახადო სისტემა აქვს, რამდენად ადვილია ბიზნესის წარმოება და მეორე კრიტერიუმი, არის ის, რომ ამა თუ იმ ქვეყანას, მის ეკონომიკას რა შესაძლებლობები გააჩნია, რომ ინვესტორს შესთავაზოს, - ამის შესახებ „იმედის დილაში“ რუბრიკა Business Insider Georgia-ში სტუმრობისას პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარემ შოთა ბერეკაშვილმა განაცხადა.

კომიტეტის ხელმძღვანელის თქმით, საქართველოს დღეს გარკვეული უპირატესობები გააჩნია, რომ ინვესტორებმა კაპიტალი ჩადონ წარმოებაში და ის წარმოების პოტენციალი, რაც ქვეყანას გააჩნია  მაქსიმალურად იყოს გამოყენებული. 

„დავიწყოთ პირველით. საგადასახადო ნაწილში საქართველოს უაღრესად ლიბერალური საგადასახადო სისტემა აქვს. მოგეხსენებათ მოგების გადასახადი საქართველოში 15%-ს შეადგენს, ბიზნესის წარმოება აბსოლუტურად ინვესტორისთვის თავისუფალია და არავითარი შემოსვლის ბარიერები არ არსებობს. კაპიტალის მოძრაობაზეც ასევე არავითარი ბარიერები არ არსებობს. ყოველივე ეს საქართველოში ქმნის ძალიან მიმზიდველ ბიზნეს გარემოს და ყველა საერთაშორისო რეიტინგის თვალსაზრისით საქართველო პირველ ათეულშია. კითხვაზე, თუ რა შესაძლებლობებს ქმნის საქართველოს ეკონომიკა უცხოური ინვესტორებისთვის აქაც ძალიან მნიშვნელოვანი ეკონომიკის სექტორებია, სადაც ინვესტორისთვის საქართველოს ეკონომიკა საინტერესოა. მე გამოვყოფდი მაგალითად ენერგეტიკული მიმართულებით, ასევე ტურისტული ინდუსტრიის მიმართულებით, IT ტექნოლოგიების მიმართულებით, რომელიც საკმაოდ საინტერესო და მნიშვნელოვანი კონტრიბუტორია ექსპორტის თვალსაზრისით. ბოლო პერიოდში განსაკუთრებით დიდი როლი ეთმობა შუა დერეფნის ფუნქციას და ამ სატრანზიტო დერეფნის ფარგლებში ინვესტორებისთვის ძალიან მიმზიდველი ხდება, როგორც ლოგისტიკური ჰაბების მშენებლობა, ასევე ინვესტიციები აეროპორტის, პორტების მშენებლობაში. და აქ დიდი პოტენციალია, რომ გამოვიყენოთ. ძალიან მნიშვნელოვანია, რომ საქართველოს გააჩნია თავისუფალი ვაჭრობის ხელშეკრულებები ევროკავშირის ქვეყნებთან, ჩინეთთან, თურქეთთან, პოსტ სსრკ-ს ქვეყნებთან და ეს ყველაფერი ინვესტორებისთვის საინტერესოს ქმნის იმისთვის, რომ ინვესტიციები განახორციელონ წარმოებაში და წარმოების პოტენციალი რაც საქართველოს გააჩნია ჩვენ მაქსიმალურად გამოვიყენოთ“, - განაცხადა შოთა ბერეკაშვილმა.