რა შემოსავალი მიიღო საქართველომ ოქროს ექსპორტიდან

მიმდინარე წელს ოქროს ექსპორტიდან საქართველომ 57,712.39 ათასი დოლარის შემოსავალი მიიღო.  აღნიშნული მაჩვენებლები კი 2022 წლის ანალოგიურ პერიოდთან 1.1%-იან ზრდას აჩვენებს, რადგანაც 2022 წლის 8 თვეში ქვეყანამ 57,057.15 ათასი დოლარის ღირებულების ოქრო გაყიდა. 

საქსტატის ინფორმაციით, 2023 წლის იანვარ-აგვისტოში ექსპორტზე 1.83 ტონა ოქრო დაუმუშავებელი ან ნახევრადდამუშავებული, ან ფხვნილის სახით გავიდა. 

რეალურად 8 თვეში გაყიდული დაუმუშავებელი ან ნახევრადდამუშავებული ოქრო სულ 3 ქვეყანაში გადაიზიდა, საიდანაც ლიდერი შვეიცარიაა, რომელზეც ამ მადნის ექსპორტის 88%-ი მოდის.

სად გაყიდა საქართველომ ოქრო (ოქრო დაუმუშავებელი ან ნახევრადდამუშავებული, ან ფხვნილის სახით)

• შვეიცარია - 1.66 ტონა - 50,664.44 ათასი დოლარი,
• თურქეთი - 0.12 ტონა - 4,814.70 ათასი დოლარი,
• არაბთა გაერთიანებული საამიროები - 0.05 ტონა - 2,233.25 ათასი დოლარი.

ბოლო წლების სტატისტიკით ყველაზე მეტი ოქროს ექსპორტი 2010 წელს დაფიქსირდა. საანგარიშო პერიოდში ქვეყანამ ექსპორტზე 117,646.68 ათასი დოლარის ღირებულების 7.19 ტონა ოქრო გაიტანა.