ოქტომბერში, აშშ-ში ჩვენი პროდუქციის მცირე პარტიის პირველ ექსპორტს განვახორციელებთ, - ამის შესახებ Business Insider Georgia-ს ჩირიფრუტი ChiriFruit-ის თანადამფუძნებელმა და დირექტორმა სოფო ჯიქიამ განაცხადა.
მისი თქმით „ჩირიფრუტის“ ნაწარმზე აშშ-სა და დუბაის ბაზარზე ინტერესი გაჩნდა.
როგორც სოფო ჯიქია ამბობს, „ჩირიფრუტი“ აშშ-ის ბაზარზე 5 დასახელების პროდუქტს გაიტანს.
„პირველი ექსპორტი აშშ-ში ოქტომბერში გვავს დაგეგმილი. ეს იქნება 5 დასახელების პროდუქტისგან შემდგარი მცირე პარტია. გვაქვს მოლოდინი, რომ „ჩირიფრუტის“ ნუგბარი მოეწონება დაიმსახურებს და შემდეგ აშშ-ის ბაზრიდან უფრო დიდ შეკვეთას მივიღებთ“, - ამბობს სოფო ჯიქია.
კომპანიის თანადამფუძნებელის ინფორმაციით, ასევე საცდელი ნიმუშები გადაგზავნეს დუბაიში და საექსპორტო შეკვეთის მოლოდინში არიან.
„ჩირიფრუტი“ ქართული ტკბილეულის კომპანიაა, რომელიც 2014 წელს სამმა დამ დააარსა. ბრენდი აერთიანებს 80-მდე სახეობის ტკბილეულს, რომელიც მზადდება ეკოლოგიურად სუფთა გარემოში, ნებისმიერი დანამატებისა და კონსერვანტების გარეშე. ჩურჩხელა, ჩირი, მენდიანტი, შოკოლადის ბურთულები, ეს ის მცირე ჩამონათვალია, რომელსაც ბრენდი მომხმარებლებს სთავაზობს.
უახლესი
