„აწარმოე საქართველოში“ პროგრამის ბენეფიციარი „სკიჯის სახლი“კოტეჯებს ამატებს და გურიაში დამზადებული ჩირის ექსპორტს გეგმავს

,,სკიჯის სახლი“ გურიაში, სოფელ ხიდისთავში ეკოტურისტული ობიექტია. თბილისიდან მამაპაპისეულ სახლში გადასულმა დარეჯან ბერძენიშვილმა საქმიანობა ჩირის წარმოებით დაიწყო და უკვე საკუთარი საწარმო და საოჯახო სასტუმრო აქვს, რომელსაც ძალიან მალე რამდენიმე კოტეჯი დაემატება.

დარეჯან ბერძენიშვილი ,,აწარმოე საქართველოში“ მიკროგრანტების პროგრამის ბენეფიციარია. 2020 წელს USAD-ის „სოფლის მეურნეობის განვითარების პროგრამის“ გრანტის მოგების შედეგად კომპანია „სკიჯმა“ 150 წლიან გურულ ოდაში ჩირების საამქრო ააშენა და ევროპული მანქანა-დანადგარებით აღჭურვა.

როგორც თავად ამბობს, გურული ჩირი ტურისტულ პროდუქტად გადააქცია, რომლის რეალიზაციასაც უკვე ქვეყნის გარეთ გეგმავს.

„მიმდინარე ეტაპზე სასტუმროს ვაშენებთ. ძირითადი საქმიანობა ჩირის წარმოებაა, რასაც სასტუმროს ხაზი დავამატეთ. კონცეფცია იგივეა, როგორიც მეღვინეობის დარგშია - მარანი და სასტუმრო. გურულ ოდაში მოთავსებული ჩირის საამქრო საერთაშორისო სტანდარტის შესაბამისია. საწარმო ევროპული ტექნოლოგიით არის აღჭურვილი.

საქმიანობა მცირე, 6000-მდე ლარის გრანტით დავიწყე, რაშიც ,,აწარმოე საქართველოში“ დაგვეხმარა. პროგრამის გრანტი ჯამში 15 000 ლარია. მოგვიანებით საამქრო USAD-ის დახმარებით გაფართოვდა. წარმოებულ ჩირს ჯერჯერობით ადგილზე ვყიდით, თუმცა ვგეგმავთ ექსპორტზე გატანას, იქიდან გამომდინარე, რომ ამ პროდუქტის აზიურ ქვეყნებში განსაკუთრებით მზარდი მოთხოვნაა, ექსპორტს ამ მიმართულებით დავიწყებთ“, - ამბობს დარეჯან ბერძენიშვილი.

რაც შეეხება ეკოტურისტული პროექტს, სასტუმრო კომპლექსის მშენებლობა თიბისის და „აწარმოე საქართველოს“ მხარდაჭერით დაიგეგმა.

„ტურიზმის მიმართულებით ამბიციური გეგმა გვაქვს. გვინდა გასტრონომიული ტურიზმის ერთ-ერთ წამყვან ცენტრად ვიქცეთ რეგიონში. წლის ბოლომდე იგეგმება 12 სტუმარზე გათვლილი 3 სასტუმრო კოტეჯის და გასტროტურისტული ლოკაციის - სამზარეულო-სასადილო მშენებლობა, რომელიც „სკიჯის სახლში“ მისულ სტუმრებს გურული ტრადიციული კერძების განსაკუთრებულ, ჩირებით გამდიდრებულ გემოებს შესთავაზებს. მთლიანობაში, ნაბიჯ-ნაბიჯ აწყობილი ბიზნესია, რომელზეც მუშაობა წლის ბოლომდე დასრულდება. საბოლოდ გვექნება განსხვავებული კონცეფციის ბიზნესი: ჩირის წარმოების გარშემო განვითარებული, ხილის საჩვენებელი მეურნეობა, კოტეჯები და ტრადიციული სამზარეულო,“ - ამბობს დარეჯან ბერძენიშვილი.

გვიხსნის, რომ „სკიჯი“ ძველი ქართული სიტყვაა და ქიშმიშსა და ჩამიჩს ნიშნავს, სწორედ ამიტომ თავის კომპანიას, რომლის მთავარ საქმიანობაც ხილის და ჩირის წარმოებაა, „სკიჯი“ დაარქვა. ამ ეტაპზე ,,სკიჯის სახლი“ 5 ადამიანს ასაქმებს.