დღეს კიდევ ერთი ახალი, კომფორტული სივრცე შეემატა თბილისის აეროპორტს, ეს არის ახალი ბიზნესლაუნჯი, ვფიქრობ რომ ძალიან მოეწონება ყველა მგზავრს, რომელიც მიფრინავს თბილისის საერთაშორისო აეროპორტიდან, - ამის შესახებ TAV Georgia-ს გენერალურმა მენეჯერმა თეა ზაქარაძემ განაცხადა.
მისი თქმით, ამ ეტაპზე მგზავრთნაკადი ივნისში 50%-ითაა გაზრდილი და შესაბამისად ძალიან დროული იყო ეს პროექტი.
„თბილისის აეროპორტის ლაუნჯის მოცულობა გაიზარდა 84%-ით, რაც გვაძლევს საშუალებას, რომ 73%-ით მეტ მგზავრს მოვემსახუროთ. ჩვენ განვაგრძობთ ინვესტირებას თბილისისა და ბათუმის საერთაშორისო აეროპორტებში, მგზავრთნაკადი წლიურ ჭრილში 35%-ით არის გაზრდილი. ჩამოფრენის ტერმინალში გვაქვს პროექტი, რომელიც ოქტომბერში დასრულდება. იზრდება სასაზღვრო სივრცე და ჯიხურების რაოდენობა 9-დან 13-მდე, რაც მგზავრთნაკადისთვისა და იმ ტრაფიკისთვის რაც ახლა გვაქვს, არის აუცილებელი და საჭირო.
ასევე მგზავრთნაკადის მნიშვნელოვანი ზრდა გვაქვს ბათუმის საერთაშორისო აეროპორტში. ველოდებით უფრო მეტ ჩარტერს, უფრო მეტ ავიაკომპანიას. გვაქვს მოლოდინი, რომ მგზავრთნაკადი კიდევ უფრო გაიზრდება და 2025 წელს ორივე აეროპორტი ამისთვის კიდევ უფრო მომზადებული იქნება“, - განაცხადა თეა ზაქარაძემ.
უახლესი
