გალტ & თაგარტმა სწრაფად რეალიზებადი სამომხმარებლო პროდუქციის - FMCG სექტორის შესახებ საინვესტიციო კვლევა წარადგინა, სადაც ბაზრის მიმდინარე მდგომარეობა და სექტორის განვითარების პოტენციალია გაანალიზებული. კონფერენციაში მონაწილეობდნენ დარგის მოთამაშეები, ინვესტორები და საერთაშორისო საფინანსო ინსტიტუტების წარმომადგენლები. ამასთან, კონფერენციაზე მოწვეული იყვნენ რეგიონის ქვეყნების FMCG ბაზრის წარმომადგენლები, რომელთაც ბაზრის მოთამაშეებს რეგიონის ქვეყნებში მიმდინარე ტენდენციები გაუზიარეს.
კვლევის მიხედვით, ბოლო 5 წლის განმავლობაში FMCG სექტორის ზომა თითქმის გაორმაგდა და 2023 წელს 21 მილიარდი ლარი შეადგინა. აქედან ბრენდული ქსელები ბაზრის 39%-ს იკავებს, რაც 2018 წელს არსებული 22%-დან მკვეთრი ზრდაა. ბაზრის დანარჩენი ნაწილი არაბრენდულ მაღაზიებს, აფთიაქებს და არაფორმალურ ვაჭრობას უჭირავს. ამასთან, FMCG ბაზრის 48% თბილისშია კონცენტრირებული, ხოლო დანარჩენი რეგიონებზე მოდის, საიდანაც ყველაზე დიდი წილი აჭარას და იმერეთს უკავია. ბუნებრივია, FMCG პროდუქციაზე ადგილობრივი მოსახლეობა ყველაზე მეტს ხარჯავს, თუმცა ბოლო 2 წელში სექტორის ზრდაში ტურისტების და მიგრანტების კონტრიბუციაც დიდი იყო. ამასთან, გალტ & თაგარტის კვლევის მიხედვით, FMCG ბაზარზე ყველაზე მეტი, 70% საკვებ პროდუქტებზე იხარჯება, რომელსაც მოჰყვება სასმელები და თამბაქო.
აღსანიშნავია, რომ ბაზრის ტენდენციების უკეთ გასაანალიზებლად, გალტ & თაგარტმა კომპანიების გამოკითხვა ჩაატარა, რაც ოფიციალურად ხელმისაწვდომ მონაცემებთან ერთად ბაზარზე მიმდინარე ტენდენციების რეალურ დროში შეფასების საშუალებას იძლევა. ეს ინფორმაცია, სექტორის გლობალური ტენდენციების ცოდნასთან ერთად, გალტ & თაგარტს საშუალებას აძლევს დარგის მოთამაშეებს სტრატეგიული განვითარების ხედვა შესთავაზოს. კერძოდ, კვლევა პასუხობს შემდეგ კითხვებს - რომელ რეგიონებშია ბრენდული ქსელების გაფართოების პოტენციალი; რა ფორმატის მაღაზიებია სწრაფად მზარდი; პროდუქტების რა ასორტიმენტზე უნდა გამახვილდეს ყურადღება და მომხმარებლის რა სეგმენტებზე უნდა ფოკუსირდნენ კომპანიები მომავალი 5 წლის განმავლობაში.
„სექტორების სიღრმისეული შესწავლა და ამის საფუძველზე ინვესტორებისათვის საინვესტიციო გადაწყვეტილებების მიღებაში დახმარება ჩვენი მთავარი ამოცანაა. სწორედ, ამ მიზანს ემსახურება დღევანდელი კონფერენციაც, რომ ბაზრის მოთამაშეებს გავუზიაროთ FMCG-ის სექტორის ტენდენციები, ანალიტიკა და მოლოდინები სწრაფად ცვალებად გარემოში. ვფიქრობთ, ამ მიმართულებით გლობალურ და რეგიონის ქვეყნების FMCG ბაზარზე მიმდინარე ტენდენციების ანალიზი დარგისთვის ღირებულია, რასაც დღევანდელი ჩვენი კონფერენცია ემსახურება,“ - განაცხადა გალტ & თაგარტის გენერალურმა დირექტორმა, ლევან შავკაციშვილმა.
დამატებითი ინფორმაციისთვის გთხოვთ ეწვიოთ ვებგვერდს: www.gt.ge
უახლესი
