საყოველთაო ჯანდაცვას შესაძლოა, კერძო სადაზღვევო პაკეტი „დაშენდეს“ და ე.წ. „ჯიბიდან გადახდები“ მინიმუმამდე დავიდეს.
საყოველთაო ჯანდაცვის პაკეტზე კერძო სადაზღვევო პაკეტის „დაშენების“ საკითხი მე-14 ეკონომიკურ ფორუმზე გაჟღერდა, რომელსაც დევნილთა, შრომის, ჯანმრთელობისა და სოციალური დაცვის მინისტრი მიხეილ სარჯველაძეც ესწრებოდა.
მინისტრმა კერძო სექტორის ინიციატივა მოისმინა და საკითხზე შემდგომი განხილვისა და მსჯელობის პირობა დადო.
როგორც Business Insider Georgia-სთან დაზღვევის სახელმწიფო ზედამხედველობის სამსახურის უფროსმა დავით ონოფრიშვილმა განაცხადა, თუ კი საკითხზე მსჯელობები შედგება ეს რეალურად წაადგება ყველა მხარეს, როგორც სახელმწიფო, ისე კერძო სექტორს და რაღა თქმა უნდა მომხმარებელს.
„დღეს საქართველოში ჯანმრთელობის დაცვის კუთხით 700 ათასი ადამიანი კერძო სადაზღვევო კომპანიების მიერაა დაზღვეული, რაც საკმაოდ დიდი ციფრია და ეს მაჩვენებელი ყოველწლიურად იზრდება. დღეს წამოიჭრა ისეთი საკითხები როგორიცაა, ვინც სახელმწიფო დაზღვევაშია ჩართული, მათ არ აქვთ უფლება მონაწილეობა მიიღონ კერძო სადაზღვევო კომპანიების პროგრამებში და პირიქით. ამიტომ იყო რიგი მოსაზრებები გამოთქმული, მათ შორის ჩემს მიერ, რომ საყოველთაო დაზღვევაში მყოფ ადამიანებს, ვისაც ექნება საშუალება და სურვილი, საყოველთაო დაზღვევაზე ზემოდან დაშენდეს კერძო დაზღვევაც. თუ სუბიექტს აქვს სურვილი, მაშინ მას ჰქონდეს უფლება იყიდოს ისეთი სადაზღვევო პროდუქტები, რომელთაც სადაზღვევო კომპანიები მათი მოთხოვნის მიხედვით შექმნიან. ეს მსოფლიო ბაზარზე რაიმე განსაკუთრებული სიახლე არ არის და ძალიან ბევრ ქვეყანაში ეს მოდელი მუშაობს, სადაც სახელმწიფო თავის მოქალაქეებს სადაზღვევო მინიმუმს აძლევს, და ამის შემდეგ მოქალაქე თავად წყვეტს რა პროდუქტი დააშენოს და თავად გადაიხადოს თანხა.
მეორე თემაა რაც ადრე იყო საქართველოში სხვადასხვა კერძო ჯგუფების გადმოყვანა სადაზღვევო კომპანიების მომსახურებაზე, რასაც სახელმწიფო დააფინანსებს, მაგრამ ამ პროდუქტების ჩამონათვალს შექმნის სახელმწიფო, გარკვეულ ფასს დაადებს და შემდეგ ვინც იაფად შეასრულებს სადაზღვევო კომპანია იქნება თუ კომპანიათა ჯგუფი. ჯანმრთელობის დაზღვევის კუთხით კომპანიები საკმაოდ მოძლიერდნენ აქვთ დიდი გამოცდილება, მათ შორის მართვის. და თუ ეს მოხდება, ჩემი აზრით უფრო ეფექტიანი იქნება ასეთი მართვა და გარკვეულ სახსრებს ჯანდაცვის ბიუჯეტიც კი დაზოგავს და ამ გამოთავისუფლებულ თანხის სხვა მიზნებისთვის გამოყენებას შეძლებს. ყოველ შემთხვევაში არის მთელი რიგი საკითხები, რომელიც არის სამსჯელო“, - აღნიშნა დავით ონოფრიშვილმა.
უახლესი
