ბანკების მიერ გაცემული სესხების მოცულობა ერთ თვეში 2,5%-ით გაიზარდა

ეროვნულ ეკონომიკაზე გაცემული სესხების მოცულობა ერთ თვეში 2,5%-ით გაიზარდა. სებ-ის ვებგვერდზე განთავსებული სტატისტიკური მაჩვენებლების მიხედვით, 2024 წლის დეკემბრის მდგომარეობით კომერციული ბანკების მიერ ეროვნულ ეკონომიკაზე (რეზიდენტ იურიდიულ და ფიზიკურ პირებზე) გაცემული სესხების მოცულობამ 60 211,6 მლნ ლარი შეადგინა, მაშინ როდესაც 2024 წლის ნოემბრის მაჩვენებელი 58 720,6 მლნ ლარი იყო.

თუ აღნიშნულ მაჩვენებლებს წლიურ ჭრილში გავაანალიზებთ, სახეზეა 118,3%-იანი ზრდა. 2023 წლის დეკემბერში ეროვნულ ეკონომიკაზე გაცემული სესხების მოცულობა 50 855,3 მლნ ლარის დონეზე იყო.

მიმდინარე მაჩვენებლების მიხედვით, ეროვნულ ეკონომიკაზე გაცემული სესხების 47,3%-ი იურიდიულ კომპანიებზე გაცემული სესხებია, დეკემბრის მაჩვენებლებით საუბარია 28 483,3 მლნ ლარზე. თვიურ ჭრილში ზრდა 3,7%-ია, ხოლო წლიურად  20,3%-იანი ზრდა. 

რაც შეეხება შინამეურნეობებზე გაცემულ სესხებს 2024 წლის დეკემბრის მდგომარეობით 31 728,3 მლნ ლარია, ზრდა ნოემბერთან შედარებით 1,5%-ია, ხოლო 2023 წლის დეკემბერთან შედარებით 16,7%-ი.