არქი პირველი ამერიკული პროექტის განხორციელებისთვის ემზადება - ინვესტიცია $50 მილიონია 

არქი მაიამიში პროექტის დასაწყებად ემზადება. როგორც დეველოპერულ კომპანიაში განმარტავენ,  არქი მაიამის მშენებლობის ნებართვის გაცემის პროცესი ფინალური ეტაპზეა და არქის პირველი ამერიკული პროექტის მშენებლობა სულ მალე დაიწყება.

„პროექტი მაიამიში, პომპანო ბიჩზე მდებარეობს და მაღაზიები, რესტორნები თუ ყველა საჭირო ობიექტი ფეხით სავალ მანძილზე აქვს. არქი მაიამის პროექტისთვის ინვესტიციის სახით გამოყოფილია 50 მილიონი დოლარი, რასაც არქი ამერიკულ დეველოპერულ კომპანია - Elit Group-თან პარტნიორობით ახორციელებს“, - აცხადებენ აქრიში. 

„მრავალწლიანი დაუღალავი შრომისა და საქართველოში განხორციელებული მაღალი დონის პროექტების შემდეგ, ვფიქრობ, „არქი“ მზად არის, გასცდეს ქვეყნის ფარგლებს და თავი უცხოურ ბაზარზეც დაიმკვიდროს. რა თქმა უნდა, საქართველოში საქმიანობას კვლავ გავაგრძელებთ – გეგმაში არაერთი პროექტი გვაქვს, რომლებსაც სხვადასხვა რეგიონში განვახორციელებთ. თუმცა პარალელურად „არქი“ თავის ძალისხმევას უცხოური ბაზრის ათვისებისკენაც მიმართავს“, –  „არქის“ დამფუძნებელი ილია წულაია.

ფლორიდის შტატი, სადაც „არქის“ ახალი მასშტაბური პროექტის განხორციელება იგეგმება, ერთ-ერთი ყველაზე მიმზიდველი ადგილია ტურისტებისთვის, დასაქმების დიდი შესაძლებლობებითა და ბიზნესისთვის მოქნილი კანონმდებლობითაც გამოირჩევა.