2024 წლის ბოლოსთვის კომპანია Apple-მა, შესაძლოა, შერეული რეალობის სათვალის Vision Pro-ს წარმოება, მოწყობილობაზე დაბალი მოთხოვნის გამო შეწყვიტოს.
The Information-ის თანახმად, კომპანიამ ზაფხულის დასაწყისში უკვე მნიშვნელოვნად შეამცირა Vision Pro-ს კომპონენტების წარმოება. ამჟამად Apple-ს თავის საწყობებში საკმარისი რაოდენობის მოწყობილობა გააჩნია, რათა მომდევნო წლის განმავლობაში მოთხოვნა დააკმაყოფილოს.
მომწოდებლებმა 500,000-600,000 სათვალისთვის შესაბამისი კომპონენტები დაამზადეს. ზოგიერთმა ქარხანამ, Apple-ის გაყიდვების პესიმისტური პროგნოზების გამო, ნაწილების წარმოება მაისში შეწყვიტა. კომპანიის საწყობებში ჯერ კიდევ ინახება ათიათასობით გამოუყენებელი კომპონენტი.
ჩინურმა კომპანია Luxshare-მა, რომელიც Vision Pro-ს აწყობს, Apple-ისგან წარმოების შესაძლო შემცირების შესახებ შეტყობინება უკვე მიიღო. ახლა კომპანია აწარმოებს თითქმის ათას მოწყობილობას დღეში, რაც პიკური მაჩვენებლის ნახევარია.
Apple-მა ასევე შეაჩერა მეორე თაობის Vision Pro-ს განვითარება სულ მცირე ერთი წლით. კომპანიამ ყურადღება გაამახვილა მოწყობილობის ბიუჯეტური ვერსიის შექმნაზე.
ბაზრის ანალიტიკოსების განმარტებით, მეორე თაობის Vision Pro-ს წარმოების შეჩერების მიუხედავად, კომპანიამ შესაძლოა გამოუშვას შუალედური განახლება დიზაინის მინიმალური ცვლილებებით და ახალი პროცესორით. ეს საშუალებას მისცემს კომპანიას გამოიყენოს ზედმეტი კომპონენტები მიწოდების ჯაჭვიდან.
უახლესი
