აქსესუარების ბრენდი Bowie-ს დამფუძნებელი სალომე გოგიჩაიშვილი Business Insider Gerogia-თან ამბობს, რომ მალე ახალი საკოლექციო ხაზების დამატებას გეგმავენ.
ერთ-ერთი, საინტერესო და გამორჩეული საბავშვო ხაზი იქნება, რადგან საბავშვო კოლექციაზე გასულ წელს დიდი მოთხოვნა იყო და ბრენდშიც დიდი სურვილი აქვთ, რომ ამ მიმართულებით განვითარდნენ.
„პროდუქციაზე მოთხოვნა უფრო და უფრო იზრდება, რაც ძალიან შესამჩნევი იყო 2023 წელს . რაც უფრო აქტიურად ვართ ჩართულები ამ საქმეში, პირდაპირ პროპორციულად იზრდება მოთხოვნაც. ვცდილობთ, რომ რაიმე ახალი შევთავაზოთ მომხმარებლებს, რათა პროდუქტებთან მიმართებით დაინტერესება და ცნობადობა გაიზარდოს“, - ამბობს სალომე გოგიჩაიშვილი.
ბრენდი საოჯახო ბიზნესის კაპიტალით შეიქმნა და უკვე 5 წელია რაც ბაზარზე აქტიურად ოპერირებს და ამ დროისთვის მომხმარებელს საყელოებს, ნაქარგ პერანგებს, სუფრის აქსესუარებს, ბაფთებს, აბრეშუმის შარფებს, თმის სამაგრებსა და ვინტაჟურ ჩანთებს სთავაზობს.
ბრენდში მრავალფეროვანი და მაღალხარისხიანი მასალები აქვთ, რომლის შეძენაც საქართველოში ხდება.
„პროდუქტს ვქმნით ჩვენი დიზაინით, ასევე მომხმარებელს თავადაც შეუძლია აირჩიოს და შემოგვთავაზოს, თუნდაც ჩვენი დიზაინი გადააკეთოს და შეგვიკვეთოს. ძალიან მნიშვნელოვანია, მასალაც, რომლითაც აქსესუარები მზადდება. ამიტომ მასალის შერჩევაც მომხმარებელთან ერთად ხდება. მომხმარებელს სრული თავისუფლება აქვს, რა თქმა უნდა ჩვენს აზარსაც ვუზიარებთ და საბოლოოდ სასურველ შედეგამდე მივდივართ“, - ამბობს ბრენდის დამფუძნებელი.
ბრენდში გაფართოების დიდი სურვილ აქვთ რის გამოც ამ დროისთვის მოლაპარაკებებს აწარმოებენ სხვადასხვა მაღაზიებთან პროდუქციის განთავსებაზე.
Bowie-ს პროდუქცია განთავსებული აქვს ამერიკულ ონლაინ პლატფორმა Etsy-ზე, საიდანაც ხდება პროდუქტის სხვადასხვა ქვეყნებში რეალიზება. იმის გათვალისწინებით, რომ პლატფორმა ამერიკულია, უმეტესად მოთხოვნა ამ ბაზრიდანაა.
მომხმარებელს პროდუქტის შეძენა შეუძლია ონლაინ, სოციალური ქსელების საშუალებით ან ვებგვერდით, სადაც დამატებით ინფორმაციასაც გაეცნობიან.
ბაფთების საშუალო ფასი-30 ლარია, საყელოების 55ლარი და თუ მომხმარებელს საკუთარი დიზაინით სურს აქსესუარის დამზადება, ამ შემთხვევაში ფასს დიზაინის სირთულე და ქსოვილი განაპირობებს.
ბრენდი ამ დროისთვის ასაქმებს 6 ადამიანს.
