მონეტარული პოლიტიკის გადაწყვეტილება ასახავს გეოპოლიტიკური ვითარებიდან მომდინარე გაზრდილ ინფლაციურ რისკებს - ეკატერინე მიქაბაძე

თეგეტა ბიზნესისთვის

მონეტარული პოლიტიკის გადაწყვეტილება ასახავს გეოპოლიტიკური ვითარებიდან მომდინარე გაზრდილ ინფლაციურ რისკებს - ეკატერინე მიქაბაძე

25.03.2026.14:08

საჭიროების შემთხვევაში თუ ადგილი ექნება მეორე რაუნდის ეფექტების გაძლიერებას, ეროვნული ბანკი მზად არის მონეტარული პოლიტიკის დამატებით გამკაცრებისთვის - აცხადებს ეროვნული ბანკის პირველი ვიცე-პრეზიდენტი ეკატერინე მიქაბაძე 25 მარტის მონეტარული პოლიტიკის კომიტეტის გადაწყვეტილების შეფასებისას.

,,საქართველოს ეროვნული ბანკის მონეტარული პოლიტიკის კომიტეტმა რეფინანსირების განაკვეთი უცვლელად 8%-ზე შეინარჩუნა. გადაწყვეტილება ასახავს გეოპოლიტიკური ვითარებიდან მომდინარე გაზრდილ ინფლაციურ რისკებს. ნავთობის ფასების ზრდა ადგილობრივ ბაზარს ნაწილობრივ უკვე გადმოეცა და ინფლაციაზე მოკლევადიან პერიოდში ზრდის მიმართულებით მოქმედებს. გეოპოლიტიკური ვითარებიდან გამომდინარე გაურკვევლობა მაღალია. არსებული პროცესების ხანგრძლივობა მნიშვნელოვნად ზრდის გლობალურად ინფლაციურ რისკებს”, - აცხადებს სებ-ის პირველი ვიცე-პრეზიდენტი.

მისი თქმით ეროვნული ბანკი აქტიურად დააკვირდება პროცესებს და იქმოქმედებს საჭიროებისამებრ.

,,განვითარებული შოკების ინტენსივობა, გადმოცემის სიმწვავე და ხანგრძლივობა მნიშვნელოვნად არის დამოკიდებული იმაზე თუ როგორ განვითარდება მოვლენები. აქედან გამომდინარე, ეროვნული ბანკი აქტიურად დააკვირდება პროცესებს და საჭიროების შემთხვევაში თუ ადგილი ექნება მეორე რაუნდის ეფექტების გაძლიერებას, მზად არის მონეტარული პოლიტიკის დამატებით გამკაცრებისთვის”, - ამბობს ეკატერინე მიქაბაძე.