ტურიზმი, ინვესტიციები, ვაჭრობა, როგორია საქართველოსა და უნგრეთის ეკონომიკური ურთიერთობები

უნგრეთიდან საქართველოში ტურისტების ნაკადი მზარდია. ტურიზმის ეროვნული ადმინისტრაციის მონაცემებით, 2023 წლის 6 თვეში საქართველოში უნგრეთიდან 69.9%-ით მეტი საერთაშორისო ვიზიტორი შემოვიდა.

უნგრეთიდან ვიზიტორების ზრდას და პირიქით, საქართველოდან უნგრეთში ტურისტული ნაკადების ზრდას ხელს უწყობს ისიც, რომ საქართველოში წლებია ოპერირებს ევროპის ერთ-ერთი უმსხვილესი, უნგრული ავიაკომპანია Wizz Air, რომელიც ქუთაისის საერთაშორისო აეროპორტშია ბაზირებული და ყოველწლიურად ქუთაისიდან მიმართულებებს და სიხშირეებს ზრდის.

რაც შეეხება უცხოურ პირდაპირ ინვესტიციებს, 2022 წელს უნგრეთიდან საქართველოში 2.7 მლნ დოლარის ინვესტიცია განხორციელდა, რაც 2021 წლის მონაცემებთან შედარებით 32.5%-ით ნაკლები მაჩვენებელია. უნგრეთის წილი მთლიან FDI-ში 0,1%-ია. 

ორ ქვეყანას შორის მიმდინარე სავაჭრო ურთიერთობების თუ დავაკვირდებით, სახეზეა, რომ უნგრეთიდან იმპორტი ზრდას, ხოლო საქართველოდან ექსპორტი კლებას აჩვენებს.

საქსტატის ინფორმაციით, 2023 წლის იანვარ-აგვისტოში უნგრეთიდან საქართველოში 46,023.79 ათასი დოლარის პროდუქცია შემოვიდა, 2022 წლის ანალოგიურ პერიოდში კი 36,074.75 ათასი დოლარის, შესაბამისად ზრდა 28%-ია.

2022 წელს უნგრეთიდან იმპორტმა 57,494.68 ათასი დოლარი შეადგინა. 

რაც შეეხება ექსპორტს, 2023 წლის იანვარ-აგვისტოში ქვეყანამ უნგრეთში 598.58 ათასი დოლარის პროდუქცია გადაზიდა, რაც 2022 წლის ანალოგიური პერიოდის მაჩვენებლებთან შედარებით მნიშვნელოვანი კლებაა. 2022 წლის 8 თვეში საქართველოდან უნგრეთში 2,328.05 ათასი დოლარის პროდუქციის გაგზავნა ფიქსირდება. 

TOP-5 პროდუქტი, რასაც საქართველო უნგრეთში ყიდის

• მზა ნაწარმი სხვა, ტანსაცმლის თარგების ჩათვლით - 209.22 ათასი დოლარი;
• ხილისა და ბოსტნეულის წვენები - 113.28 ათასი დოლარი;
• სატელეფონო აპარატები, ფიჭური ქსელებისთვის ან სხვა უსადენო ქსელებისთვის განკუთვნილი ტელეფონების ჩათვლით - 87.60 ათასი დოლარი;
• მილები, მილაკები და ღრუ პროფილები, უნაკერო, შავი ლითონისაგან - 69.88 ათასი დოლარი;
• ფანერა დაწებებული, პანელები ხის დაფანერებული და ანალოგიური მასალები შერეული მერქნისაგან - 27.37 ათასი დოლარი.

TOP-5 პროდუქტი, რასაც საქართველო უნგრეთიდან ყიდულობს

• სამკურნალო საშუალებები დაფასოებული - 24,343.37 ათასი დოლარი;
• მზა ან დაკონსერვებული პროდუქტები ხორცის, ხორცის სუბპროდუქტებისაგან, სხვა - 2,394.66 ათასი დოლარი;
• მსუბუქი ავტომობილები - 2,316.01 ათასი დოლარი;
• საშუალებები პირის ღრუს ან კბილების ჰიგიენისათვის - 1,960.48 ათასი დოლარი;
•  ინსექტიციდები და მცენარეთა აღმოცენების საწინააღმდეგო საშუალებები და ზრდის რეგულატორები - 1,003.79 ათასი დოლარი.