ზღვისპირა კურორტებზე ტურისტული ნაკადების ზრდას ელიან. ქობულეთში მდებარე მსხვილი ტურისტული ობიექტის „კასტელო მარეს“ დამფუძნებელი ზანდა მესხიძე Business Insider Georgia- თან ამბობს, რომ ამინდის გაუმჯობესებასთან ერთად, მოსალოდნელია, რომ დამსვენებლების რაოდენობაც გაიზრდება.

მესხიძის თქმით, ამ ეტაპზე სასტუმროში დამსვენებლების ძირითად ნაწილს ადგილობრივი ტურისტები წარმოადგენენ. „მაქსიმალურად ვცდილობთ, რომ სასტუმროში დასვენება ქართველი მომხმარებლისთვის მეტ-ნაკლებად ხელმისაწვდომი გავხადოთ.

ეს აისახება კიდეც დატვირთულობაზე, ამ ეტაპზე სტუმრების ძირითადი ნაწილს ადგილობრივები შეადგენენ, თუმცა უცხო ქვეყნების მოქალაქეების მხრიდანაც იზრდება მოთხოვნა. რამდენიმე შემთხვევა იყო, რომ ჯავშნები გააუქმეს, მაგრამ საბედნიეროდ, ამას სისტემური ხასიათი არ აქვს. ველოდებით, რომ მოთხოვნა კიდევ მოიმატებს, სავარაუდოდ, 15%-ის ფარგლებში, მოლოდინი ამ მხრივ პოზიტიურია.

ველოდებით სტუმრებს პოლონეთიდან, არაბთა გაერთიანებული საამიროებიდან და მეზობელი ქვეყნებიდან, თუმცა სტატისტიკურად პირველ ადგილზე 50-52%-ით ქართველი ტურისტი არიან", - ამბობს ზანდა მესხიძე.

რაც შეეხება განთავსების ტარიფებს, მაღალ სეზონზე სასტუმროში ნომრების ფასი ერთი ღამით, 300 ლარიდან 900 ლარამდე მერყეობს. ზანდა მესხიძის თქმით, შარშანდელთან შედარებით, ფასები თითქმის შენარჩუნებულია.

ცნობისთვის, სასტუმრო „კასტელო მარე“ 5 ვარსკვლავიანი, უმაღლესი კლასის სასტუმროა, რომელიც ციხისძირში სანაპიროს პირველ ზოლში მდებარეობს. სასტუმრო 2016 წელს გაიხსნა, რომლის კომპლექსშია სამი კორპუსი (ვიქტორია, დიანა და ალბა) და ვილა აფროდიტე, რომელიც 100 ზე მეტ ოთახს და 250 სტუმარს იტევს.