წელს ყურძნის კარგ მოსავალს ველით და გვაქვს მოლოდინი, რომ ბიო ღვინის წარმოებას 10 000 ბოთლამდე გავზრდით, -ამის შესახებ Business Insider Georgia-ს „იაგოს ღვინოს“ დამფუძნებელმა იაგო ბიტარიშვილმა განუცხადა.

„საკმაოდ კარგი წელია როგორც ყურძნის მოსავლის ისე ხარისხის თვალსაზრისით. ჩვენ რთველი არ დაგვისრულებია. დაახლოებით 4 ჰექტარზე გვაქვს ვენახი, წარმადობა მცირეა, თუმცა წელს გვაქვს მოლოდინი, რომ ამ მიმართულებით ზრდა გვექნება და ბიო ღვინოს ადგილობრივ ბაზარზეც გავყიდით“, - განაცხადა იაგო ბიტარიშვილმა.

ამ დროსათვის „იაგოს ღვინო“ ექსპორტზე 11 ბაზარზეა წარმოდგენილი.

მათ შორის, ევროპის რამდენიმე ქვეყანაში, ასევე იაპონიაში, სამხრეთ კორეაში, აშშ-ში, სინგაპურში და სხვა.

„მცირე მარნის ხაზს მივყვებით, ჯერჯერობით ასეა და ამ მხრივ არც მომავალში ვაპირებთ ცვლილებას, სტატუსს ბოლომდე შევინარჩუნებთ. გარდა ამისა, უცვლელია ტექნოლოგია, რომელიც ღვინის ბუნებრივად წარმოებას გულისხმობს. ეს არის არტიზანული მეღვინეობის არსი, რაც ადამიანისა და ხელოვნების კავშირს გულისხმობს. ვცდილობთ, რაც შეიძლება მეტად განვავითაროთ ეს მიმართულება, რაც ჩვენი არჩევანია“, - ამბობს იაგო ბიტარიშვილი Business Insider Georgia - თან.

ცნობისთვის, იაგო ბიტარიშვილმა ორგანული ბიომეურნეობის განვითარება 1998 წელს, 2003 წლიდან უკვე ბუნებრივი ნატურალური ღვინის წარმოება და ქვევრის ღვინის ჩამოსხმა დაიწყო; თავდაპირველი წარმოება წლიურად 600 ბოთლ ღვინოს შეადგენდა და დღეს უკვე 7000 ბოთლი ისხმება. პირველი ბიო სერტიფიკატი ,,იაგოს ღვინომ“ 2004 წელს მიიღო. ვენახი გაშენებულია მცხეთის მუნიციპალიტეტის სოფელ ჩარდახში.