ხელნაკეთი არტ შოკოლადის ბუტიკი „შოკოტელა“ ფართოვდება. როგორც Business Insider Georgia-ს „შოკოტელას“ მფლობელმა მარიამ კაპანაძემ განუცხადა, „შოკოტელას“ რიგით მეორე ფილიალი ივლისის შუა რიცხვებში გაიხსნება და აქტიურად მიიღებს მომხმარებლებს. და რაც მთავარია, ფილიალი თბილისის ცენტრში, ტურისტულ და ხალხმრავალ უბანში იქნება განთავსებული.

„შოკოტელას“ მაღაზია იხსნება სიონის 8-ში. ეს არის „თბილელის ქარვასლას“ შენობა, სადაც ზედა სართულზე მუზეუმია, ხოლო ქვემოთ უკვე პირველ სართულზე განთავდება ჩვენი მაღაზია. ეს არის პატარა სავაჭრო ცენტრი, სადაც ძირითადად ხელნაკეთი ნივთები და სუვენირები იყიდება. 

ეს ფილიალი გათვლილი იქნება უფრო ტურისტებზე, რადგანაც „შოკოტელას“ პროდუქცია ძალიან მოსწონთ ტურისტებს. ვაკეში, ბარნოვის ქუჩაზე, სადაც ვართ წარმოდგენილები ისეთი ტურისტული ნაკადები არ არის“, - აღნიშნა მარიამ კაპანაძემ.

მარიამ კაპანაძის თქმით, ზაფხული შოკოლადის სეზონად არ მიიჩნევა, თუმცა ბრენდს უკვე ჰყავს თავისი ერთგული მომხმარებლები. 

„ზაფხული შოკოლადის სეზონი ნაკლებად არის, მაგრამ „შოკოტელას“ თავისი სტაბილური მომხმარებელი უკვე ყავს, რომელიც წლის ნებისმერ სეზონში აკითხავს. შედარებაც არ არის გაყიდვების მიმართულებით შემოდგომა-ზამთრის სეზონთან, მაგრამ კომპანია თავის შენახვას ახერხებს“, - აღნიშნავს მარიამ კაპანაძე.

„შოკოტელა“ ასორტიმენტის გამრავალფეროვნებაზე ინტენსიურად მუშაობს და უახლოეს ხანებშიც მის მომხმარებელ ახალი გემო ელოდება, რომლის დამატებასაც „შოკოტელაში“ ახალი ფილიალის გახსნის პარალელურად აანონსებენ. 

შოკოტელა არის ბრენდი ავტორული პრემიუმ ხარისხის შოკოლადის , რომელიც დამზადებულია უმაღლესი ხარისხის ინგრედიენტებით.