რძის პროდუქტების მწარმოებელი ქართული ბრენდი „შირაქი“ 2025 წელს საწარმოს მშენებლობასა და ასორტიმენტის გაფართოებას გეგმავს. 

როგორც Business Insider Georgia-ს კომპანიის დამფუძნებელმა და მფლობელმა ნიკოლოზ ბენიაიძემ განუცხადა, როგორც კი საწარმოს მშენებლობას დაასრულებენ, ასორტიმენტში იოგურტისა და ევროპული ყველების წარმოებას დაამატებენ. 

რაც შეეხება ბაზარზე არსებულ გამოწვევას, მეწარმის შეფასებით, კვლავ პრობლემად რჩება ფალსიფიკაცია, რასც პატიოსანი მეწარმე ვერ უმკლავდება. 

„ჩვენ ირანსა და ბელორუსში დამზადებულ იმპორტირებულ რძის ფხვნილს კონკურენციას ვერ გაუწევთ. ფალსიფიკაცია თუ არ აღმოიფხვრა ქვეყანაში დარგი უკან-უკან  წავა და ნედლი რძის დეფიციტი კიდევ უფრო გაიზრდება. ცნობილია, რომ ნედლი რძის დეფიციტი 70% -ია“, - ამბობს ბენიაიძე.

მეწარმის ინფორმაციით, თბილისში [ფალსიფიცირებულის ჩათვლით] დღეში 20 ტონა ყველი იყიდება. „შირაქი“ 1 ტონას აწვდის თბილისს, რაც დღიური მოხმარების 3%-ია.

რაც შეეხება 2024 წლის შეფასებას, როგორც კომპანიის დამფუძნებელი ამბობს „შირაქი“ ადგილობრივ ბაზარზე ნიშას ინარჩუნებს და მსხვილ ქსელებში 20%-ს ფარავს. 

„24 საათში  7-9 ტონა რძეს ვამუშავებთ, ყველის წარმადობა 700-800 კილოა, სულგუნთან ერთად. ასევე ვაწარმოებთ მაწონს, არაჟანს, ხაჭოს. სავაჭრო ქსელებში შეგვაქვს სულგუნი, იმერული, ქარხნული ყველი და ნადუღი. დანარჩენ პროდუქციას თბილისში საკუთარ ობიექტებში ვყიდით. თბილისი „შირაქი“ 3 ობიექტს ფლობს“, - ამბობს ნიკოლოზ ბენიაიძე. 

კომპანია „შირაქი“ 2012 წელს დაფუძნდა. საწარმო თბილისში მდებარეობს და 50-მდე ადამიანს ასაქმებს.