1-ელი თებერვლიდან ქვეყანაში ახალი გადასახადი ამოქმედდა, რაც იმას ნიშნავს, რომ საქართველოს ტერიტორიაზე შემოტანილი სავსე კონტეინერები 30 ლარით დაიბეგრება.

როგორც Business Insider Georgia-სთან საუბრისას „თბილისი დრაი პორტის“ სამეთვალყურეო საბჭოს თავმჯდომარემ ჯემალ ინაიშვილმა განაცხადა, აღნიშნული გადასახადის შემოღება არაპოპულარული გადაწყვეტილებაა. 

„ჩემი აზრით ეს არის არაპოპულარული ნაბიჯი, რადგანაც ჩვენ უნდა ვისწრაფოდეთ გადასახადების შემცირებაზე და არა გაზრდაზე. ეს კომპანიების მხრიდან დამატებით ადმინისტრირებას მოითხოვს და ათასობით კონტეინერზე შემდგომ გადასახადის გადახდაზე. 

საბოლოო ჯამში ამ გადასახადის გადახდა მოუწევს იმპორტიორს ან ექსპორტიორს, ან მათ ვინც ჩვენი დერეფნით ტრანზიტულად ისარგებლებს“, - აღნიშნა ინაიშვილმა.

აღნიშნული გადაწყვეტილების მიღება დაჩქარებული წესით მოხდა და გადასახადის დაწესებისთვის ცვლილება "ადგილობრივი მოსაკრებლების შესახებ“ კანონში შევიდა. 

1. საკონტეინერო მოსაკრებლის გადამხდელია საქონლის გადამზიდავი, რომლის საკუთრებაში ან/და სარგებლობაში არის საქართველოს ტერიტორიაზე არსებულ საზღვაო ნავსადგურში შემოტანილი/საქართველოს ტერიტორიაზე არსებული საზღვაო ნავსადგურიდან გასატანი საქონლით დატვირთული კონტეინერი.

2. საკონტეინერო მოსაკრებლის ოდენობა 1 კონტეინერისთვის 30 ლარს არ უნდა აღემატებოდეს.

3. საქონლის გადამზიდავი თავისუფლდება საკონტეინერო მოსაკრებლის გადახდისგან იმ კონტეინერისთვის, რომლითაც საქართველოს საბაჟო ტერიტორიაზე შემოტანილ იქნა მხოლოდ შემდეგი საქონელი:

ა) სტიქიური უბედურების, ავარიისა და კატასტროფის ლიკვიდაციის, აგრეთვე ჰუმანიტარული დახმარების გაწევის მიზნით გადაადგილებული საქონელი;

ბ) უცხო ქვეყნების დიპლომატიური წარმომადგენლობებისა და მათთან გათანაბრებული წარმომადგენლობების ოფიციალური სარგებლობისთვის, აგრეთვე ამ წარმომადგენლობების დიპლომატიური პერსონალისა და ადმინისტრაციულ-ტექნიკური პერსონალის (მათთან მცხოვრები ოჯახის წევრების ჩათვლით) პირადი სარგებლობისთვის განკუთვნილი საქონელი.