3 თებერვალს, 12:00 საათზე, re:school-ში ღია კარის დღე გაიმართება. როგორც Business Insider Georgia-სთან საუბრისას re:school-ის დამფუძნებელმა სალომე მგელაძემ განაცხადა, სწორედ აღნიშნულ ღონისძიებაზე მოხდება 7-9 წლის ასაკის ბავშვებზე გათვლილი ახალი მოდულის პრეზენტაცია.
ღია კარის დღეზე მისულ სტუმრებს საშუალება ექნებათ გარდა re:school-ის დამფუძნებლის სალომე მგელაძისა პირისპირ გაესაუბრონ და კითხვები დაუსვან re:invent-ის დამფუძნებელს პავლე მგელაძეს და მისგან საინტერესო რჩევები მიიღონ.
ასევე, საორიენტაციო შეხვედრის ფარგლებში სტუმრებს საშუალება ექნებათ დაათვალიერონ სასწავლო სივრცე, გაეცნონ სასწავლო პროგრამებს, შეხვდნენ re:school-ის მენტორებს, განათლების ფსიქოლოგებსა და სასწავლო ხელმძღვანელს.
„re:school-ში 3 თებერვალს გვაქვს ღია კარის დღე, სადაც გვექნება ახალი მიმართულების პრეზენტაცია, საუბარია ახალი ასაკობრივი კატეგორიის 7-9 წლამდე ბავშვების ახალ პროგრამაზე, რომელიც აერთიანებს საბაზისო უნარებს, საბაზისო ინგლისურს, ინტერნეტ უსაფრთხოებას, იმ საბაზისო მიმართულებებს, რაც მომავალში უფრო მსუყე ტექნოლოგიური მოდულების გასავლელად დასჭირდებათ. ეს არის 5 თვიანი, მოკლე საბაზისო კურსი ბიზნეს-ტექნოლოგიური უნარების განსავითარებლად.
გარდა ამისა, 3 თებერვალს ჩანიშნულ ღია კარის დღეზე კიდევ ერთხელ მოხდება 12-15 წლამდე ასაკობრივ კატეგორიაზე მორგებული, უკვე არსებული ვებ-პროგრამირების კურსისა და დამატებითი 18 მოდულის წარდგენა. ვისაუბრებთ ასევე ჩვენს სამომავლო გეგმებზე“, - აღნიშნა სალომე მგელაძემ.
სალომე მგელაძის თქმით, 7-9 წლის ასაკის ბავშვებისგან და მათი მშობლებისგან ინტერესი დიდია, რათა მათ re:school-ში მიიღონ შესაბამისი განათლება.
„დიდი მოთხოვნა იყო ამ ასაკზეც. 7 წლის ბავშვს პროგრამირებას ვერავინ ასწავლის, თუმცა ჩვენ ისეთი მოდული შევქმენით, რომელიც მოამზადებს ბავშვებს, რომ მომავალში ტექნოლოგიები სიღრმისეულად ისწავლონ და განუვითარდეთ ბიზნეს-ტექნოლოგიური უნარები. აღნიშნული მოდული საწყის ეტაპზე ჩაეშვება თბილისში. ზოგადად, სიახლეებს ჯერ თბილისიდან ვიწყებთ ხოლმე და მერე გადაგვაქვს სხვა ფილიალებში“, - აღნიშნა Business Insider Georgia-სთან საუბრისას re:school-ის დამფუძნებელმა.
რას მოიცავს 7-9 წლის ასაკობრივი ჯგუფის სასწავლო პროგრამა?
1. საბაზისო კომპიუტერული უნარები;
2. ინტერნეტ უსაფრთხოება;
3. საბაზისო კოდირებისა და პროგრამირების ლოგიკა: Scratch, Blockly;
4. ციფრული კრეატიულობა : გრაფიკული დიზაინისა და ციფრული ხელოვნების - საფუძვლები;
5. კომპიუტერის არქიტექტურა;
6. ციფრული კომუნიკაცია;
7. ციფრული და მედია წიგნიერება;
8. ემოციური ინტელექტი;
9. ინგლისური ენა;
პროგრამის მიზნებია ბავშვებს
· განუვითაროს კომპიუტერისა და ინგლისური ენის საბაზისო ცოდნა;
· გააცნოს პროგრამირების და გრაფიკული დიზაინის საფუძვლები;
· ხელი შეუწყოს ციფრულ წიგნიერებისა და კომპიუტერის პასუხისმგებლობით გამოყენებას;
· განუვითაროს კრიტიკული აზროვნების, პრობლემის გადაჭრისა და გადაწყვეტილების მიღების უნარები
· მისცეს ის საჭირო საბაზისო ცოდნა და უნარები, რაც მათ მომავალში ტექნოლოგიების უფრო სიღრმისეულად შესწავლაში დაეხმარება.
კურსის ხანგრძლივობა - 5 თვე (20 კვირა)
უახლესი
