დავიწყეთ პლატფორმა Horsetours-ის გაფართოების პროცესი და ოპერირებას საქართველოს ფარგლებს გარეთაც ვიწყებთ, - ამის შესახებ Business Insider Georgia-ს პლატფორმა Horsetours-ის თანადამფუძნებელმა და დირექტორმა ლაშა გაგოიძემ განუცხადა.
„პლატფორმაზე დამატებული გვაქვს ყირგიზეთის საცხენოსნო ტურები. შედეგად, მომხმარებლებს საცხენოსნო ტურებს ამ ქვეყანაშიც შევთავაზებთ, ასევე პარალელურ რეჟიმში მომსახურების შეთავაზება შესაძლებელია საქართველოს მიმართულებითაც.
გვაქვს მოლოდინი, რომ ჩვენი პარტნიორები თურქეთიდან ჩვენ აპლიკაციაზე მალე ატვირთავენ შესაბამის ლოკაციებს, სადაც საცხენოსნო ტურები იმართება. ამ სერვისს საქართველოს გარდა ჩვენ სხვა ქვეყნების მოქალაქეებსაც შევთავაზებთ“, - ამბობს ლაშა გაგოიძე.
როგორც პლატფორმა Horsetours-ის თანადამფუძნებელი Business Insider Georgia-სთან ამბობს, კომპანიას აქვს სიახლე.
„პლატფორმის განვითარების მიზნით, მოვიპოვეთ ჯიტა-ს გრანტი და ახლა მსოფლიოს ნებისმიერი კუთხიდან ყველას შეუძლია ჩვენს პლატფორმაზე საცხენოსნო ტურის განთავსდება. პლატფორმას, არა მხოლოდ ადგილობრივი ბიზნესი, არამედ უკვე საერთაშორისო კომპანიებიც დაემატებიან. ყირგიზეთის შემდეგ დაგვემატება თურქეთი და შემდეგ ის ქვეყნები, სადაც საცხენოსნო ტურიზმი განვითარებულია ან განვითარების პროცესშია“, - ამბობს ლაშა გაგოიძე.
პლატფორმა Horsetours-ი 2021 წელს თანადამფუძნებლებმა პირადი კაპიტალით შექმნეს, რომლის მიზანიცაა საქართველოში საცხენოსნო ტურიზმის განვითარება და მომხმარებლის გიდებთან და საცხენოსნო ტურიზმში ჩართულ ოპერატორებთან (საცხენოსნო რანჩოები) დაკავშირებაა.
Horsetours-ის თანადამფუძნებელი ამბობს, რომ კომპანიის განვითარებაში განხორციელებული ჯამური ინვესტიცია დაახლოებით 200 ათასი ლარია. პლატფორმაზე მუდმივად დასაქმებულია 5 ადამიანი, ხოლო საცხენოსნო ტურების ფარგლებში 50-ზე მეტი თანამშრომელი.
იგივე თემაზე:
საცხენოსნო ტურებზე მოთხოვნა გაორმაგდა, იზრდება ადგილობრივი ტურისტების ინტერესი - Horsetours
