ოქტომბერში საქართველოში გადმორიცხული თანხების მოცულობამ წინა წლის იმავე პერიოდთან შედარებით 1.5%-ით დაიკლო და 281.1 მლნ აშშ დოლარი შეადგინა, ხოლო საქართველოდან გადარიცხული თანხების მოცულობა 12.1%-ით 35.7 მლნ აშშ დოლარამდე გაიზარდა.

როგორც სებ-ის თვიურ მიმოხილვაში წერია, წლიურად ფულადი გზავნილების მცირედი კლება საბაზო ეფექტის ამოწურვას უკავშირდება. ოქტომბერში, რუსეთიდან ფულადი გადმორიცხვები წლიურად 44%-ით, 34 მლნ აშშ დოლარამდე, შემცირდა. თუმცა, მაღალი ტემპებით ზრდას განაგრძობდა აშშ-დან და ისრაელიდან გადმორიცხული ფულადი სახსრები (20.6%-ით და 23.1%- ით).

„ასევე, დანარჩენი ქვეყნებიდან, როგორიცაა ყირგიზეთი და გაერთიანებული სამეფო, გადმორიცხული ფულადი გზავნილები კვლავ ზრდადია (177.7%-იანი და 10.3% -იანი მატება, შესაბამისად).

კვლავ მნიშვნელოვანი წვლილი აქვს ევროკავშირის ქვეყნებიდან, იტალიიდან და გერმანიიდან გადმორიცხული ფულადი გზავნილების ზრდას.

ოქტომბერში, რეგიონის ქვეყნებიდან, კერძოდ აზერბაიჯანიდან და ყაზახეთიდან გადმორიცხულმა თანხებმა დაიკლო (11.3%-იანი და 53.8%-იანი კლება).

უკრაინიდან გადმორიცხული ფულადი გზავნილები კვლავ მინიმალურ დონეზე რჩება.

ოქტომბერში, ფულადი გზავნილების ძირითად წყაროს ევროკავშირის ქვეყნები (44.3%), აშშ (18.1%) და რუსეთი (12.2%) წარმოადგენდა. ევროკავშირის ქვეყნებიდან აღსანიშნავია იტალიის, საბერძნეთისა და გერმანიის მაღალი წილი მთლიან ფულად გზავნილებში.