როგორც წინა წლებში, 2024 წელსაც ევროკავშირში შრომითი მიგრაცია კვლავ მაღალი იყო. ეს იმ ფონზე, როდესაც ევროკავშირის რამდენიმე წევრი სახელმწიფო შრომით დეფიციტს განიცდიდა - ამის შესახებ Schengen.News წერს.

არსებული მონაცემები აჩვენებს, რომ 2024 წელს გარკვეული პერიოდის განმავლობაში ევროკავშირის ქვეყნების მიერ უცხოელ სამუშაო ძალაზე გაცემული მუშაობის ნებართვების რაოდენობა მაღალი იყო.

მაგალითად, 2024 წლის იანვრიდან ოქტომბრის ბოლომდე შვედეთმა უცხოელებზე სულ 23 870 სამუშაო ნებართვა გასცა. ასეთი მაჩვენებლები მიუთითებს იმაზე, რომ ქვეყანას სჭირდება უცხოელი მუშახელი სხვადასხვა სექტორში, განსაკუთრებით იმ სექტორებში, სადაც დეფიციტია.

უცხოელებზე ბევრი სამუშაო ნებართვა გაიცა ასევე რუმინეთსა და ირლანდიაში. ირკვევა, რომ 2024 წლის იანვრიდან სექტემბრამდე რუმინეთმა ევროკავშირის არაწევრი სახელმწიფოების მოქალაქეებზე 77,426 სამუშაო ნებართვა გასცა, ხოლო ირლანდიამ 2024 წლის იანვრიდან აგვისტომდე 27,181 სამუშაო ნებართვა.

გარდა ზემოაღნიშნულისა, გერმანიამ 2023 წელთან შედარებით წელს 10%-ით მეტი ვიზა გასცა მიგრანტ მუშაკებზე.

უცხოელი დასაქმების მსურველებზე ვიზების რაოდენობის გაზრდით გერმანიის მთავრობას სურს მოიზიდოს მეტი უცხოელი მუშახელი, რაც მის ეკონომიკას სასწრაფოდ სჭირდება.

ევროკავშირის რამდენიმე სხვა ქვეყანამ ასევე გადადგა ნაბიჯები მეტი უცხოელი დასაქმებულის მოსაზიდად, რათა ამით დაეხმარონ ბიზნესებს მთელი ქვეყნის მასშტაბით დეფიციტს გაუმკლავდნენ.