ქედის მუნიციპალიტეტ სოფელ მერისში მდებარე კოტეჯის MaLu House Merisi-ს მფლობელი ქეთი ფარჰაკი, Business Insider Georgia-თან ამბობს, რომ კოტეჯთან მისასვლელი გზა მეწყრული ზონის ნაწილია და ამ დროისთვის არსებული საფრთხის გამო, იძულებული გახდნენ კოტეჯის თებერვლის ჯავშნები გაეუქმებინათ.

„ჯავშნები გაუქმებულია, კოტეჯის ადგილმდებარეობას კი მეწყრის საფრთხე არ ემუქრება“, - ამბობს MaLu House Merisi-ს მფლობელი.

მისი თქმით, ყველაზე დატვირთული კოტეჯი ზაფხულის პერიოდშია. მერისს ძირითადად უცხოელები, ხოლო ყველაზე ხშირად ტურისტები, არაბული ქვეყნებიდან სტუმრობენ.

„კოტეჯში ყოფნა სრული განტვირთვაა.  MaLu House Merisi-ს კოტეჯიდან სტუმარი პირდაპირ უყურებს ცნობილ მერისის ჩანჩქერს. კოტეჯის ქვემოთ მოედინება მდინარე და გარშემო კი სრულიად ტყით არის გარშემორტყმული“, - ამბობს მფლობელი.

კოტეჯის დაჯავშნა შესაძლებელია როგორც AirBnb-ზე ასევე სოციალური ქსელითაც.

„მერისში ბევრი კოტეჯია, მაგრამ თუ სტუმარს სურს სრულ იზოლირებულ გარემოში ყოფნა, ჩვენთან სტუმრობას ირჩევს. კოტეჯი გარე კამერებით არის აღჭურვილი, რაც სტუმრის უსაფრთხოებას უზრუნველყოფს. კოტეჯში არის ყველანაირი კომფორტი, მომხმარებელს მხოლოდ საკვები პროდუქტებით მომარაგება დასჭირდება. მერისში არის რესტორნის კერძების ადგილზე მიტანის სერვისი. შეკვეთის შესრულება 15 წუთშია შესაძლებელი.

ზამთარში, MaLu House Merisi-ში 3 ადამიანისთვის ერთი ღამის ფასი 200 ლარია, ზაფხულში კი 300 ლარი, ხოლო 4-ზე მეტი ადამიანისთვის 450-500 ლარია.

ქედის მუნიციპალიტეტ სოფელ მერისში, კოტეჯი ორი წელია რაც გაიხსნა. მფლობელის თქმით, 2023 წელი 2022-თან შედარებით უკეთესი იყო, რადგან სოციალური ქსელის საშუალებით გაიზარდა ობიექტის ცნობადობა და უფრო მეტმა ადამიანმა გაიგო ამ ადგილის შესახებ.

სამომავლოდ, მფლობელი გეგმავს MaLu House Merisi-ის გაფართოებასა და დაფინანსების მოპოვების შემთხვევაში რამდენიმე კოტეჯის ჩადგმასა და რესტორნის აშენებას.