LisiWine-Meskhishvili Winery ხუთი თვეა რაც ადგილობრივ ბაზარზე ოპერირებს. ობიექტი ლისის ტბასთან ახლოს მდებარეობს. „მესხიშვილის მეღვინეობა“ ღვინის წარმოების პარალელურად ტურიზმის ბიზნესში შევიდა, თუმცა აქტიურად განაგრძობს ღვინის წარმოებას.

როგორც კომპანიის დამფუძნებელი ილია მესხიშვილი Business Insider Georgia-სთან ამბობს, LisiWine-Meskhishvili Winery ვენახებს ფლობს გურჯაანის რაიონში, მიღებული მოსავლის გადამუშავება ლისზე მათსავე კუთვნილ მარანში ხდება, სადაც 20 ტონამდე მოცულობის ქვევრებია განთავსებული.

„ძირითადად ქვევრის ღვინოს ვაწარმოებთ, რომელსაც ექსპორტზე ვყიდით. ჩვენს ასორტიმენტშია 8 სახეობის ღვინო, რომელიც კახური ჯიშის ყურძნისგან მზადდება. ექსპორტზე გაგვაქვს პორტუგალიაში, გერმანიაში და ახლა ვემზადებით ღვინის ექსპორტისთვის ავსტრალიაში“, - ამბობს კომპანიის დამფუძნებელი. მისი თქმით, ავსტრალია ღვინის ქვეყანაა, სადაც ქართული ღვინო ტრენდული გახდა. „ასევე პორტუგალიაშიც, რომელიც ღვინის წარმოებით მსოფლიოში მე-14 ადგილზეა, ქართული ღვინო პოპულარულია და ნელ-ნელა ამ ბაზარზე თავის ადგილს იმკვიდრებს. ჩაანაცვლა ერთგვაროვანი კლასიკური ღვინოები ქვევრის ღვინომ“, - ამბობს ილია მესხიშვილი.

კომპანია ასევე ღვინის ექსპორტს გეგმავს პოლონეთში და ამ კუთხით მოლაპარაკებები უკვე დაიწყო.

„ჩვენთვის საინტერესოა აშშ-ის ბაზარი. საგულისხმოა, რომ პორტუგალიასა და გერმანიაში კომპანიის გაყიდვები იზრდება“, - ამბობს კომპანიის დამფუძნებელი.

„საოჯახო მარანი“ 10 000 ბოთლ ღვინოს აწარმოებს.