Kusa Food Balls - მალე ბაზარზე ახალი ქართული ბრენდი გამოჩნდება

მალე ქართულ ბაზარზე ახალი ბრენდი Kusa Food Balls გამოჩნდება, რომელიც მომხმარებლებს მჭადის საბეჭდი მანქანით დამზადებულ მჭადის სეტებს შესთავაზებს, - ამის შესახებ Business Insider Georgia-ს კომპანიის დამფუძნებელმა, გიორგი მორდეხაშვილმა განუცხადა.

„ქართული ფასტფუდის კონცეფციის იდეა 15 წლის გაჩნდა. შემდეგ კი მოვიფიქრე ტექნოლოგია, რომლითაც შესაძლებელია საკვები ბურთულების მასობრივი წარმოება. 6 თვის წინ ამ იდეის რეალიზაცია დავიწყე. გავაკეთე წარმოება, სადაც ნახევარფაბრიკატებს ვამზადებთ და უკვე ვემზადებით ქართული ფასტ ფუდის გაყიდვის მიზნით თბილისში წერტილების გასახსნელად“, - ამბობს გიორგი მორდეხაშვილი.

როგორც Kusa Food Balls-ის დამფუძნებელი ამბობს, ქართული ფასტ ფუდის წარმოება სამომავლოდ მასშტაბური გახდება.

„შეგვიძლია დღეში 20 000 ბურთულა ვაწარმოოთ. ეტაპობრივად გავზრდით წარმოებას. შესაძლებელი გახდება პროდუქციის უცხოეთში გატანაც. ჯერ რა თქმა უნდა წარმოების განვითარება ადგილობრივი ბაზრიდან უნდა დავიწყოთ“, - ამბობს მორდეხაშვილი.

მისი თქმით, ეს კონცეფცია, ზუსტად იმ სტანდარტებით არის დაგეგმილი, რომელსაც უცხოური ცნობილი ბრენდები იყენებენ. ერთი სეტის საფასური კი, რომელშიც 6 ბურთულა შევა, საშუალოდ 8-12 ლარი იქნება.

„ვფიქრობ, რომ ქართული ფასტ ფუდის კონცეფცია ძალიან წარმატებული იქნება. აქამდე ეს ნიშა თავისუფალი იყო, რადგან ამ სეგმენტში ძირითადად უცხოეური ბრენდები არიან წარმოდგენილი. პროდუქტი ინოვაციურია და ვინც დააგემოვნა ყველას მოსწონს. დღეს გვაქვს ცხრა სახის ბურთულა. საბოლოო ჯამში წარმოებაში 16-ს ჩავუშვებთ“, - ამბობს Kusa Food Balls-ის დამფუძნებელი.

კომპანიის დამფუძნებლის ინფორმაციით, პირველ ეტაპზე თბილისში Kusa Food Balls-ის 40-მდე წერტილი გაიხსნება, შემდეგ კი კომპანია რეგიონებშიც გავა.