კონკურენციის სააგენტოს დასკვნას არ ვეთანხმებით და ვგეგმავთ, რომ გავასაჩივროთ, - ამის შესახებ Business Insider Georgia-ს კომპანია „სოკარ ჯორჯია პეტროლიუმში“ განუცხადეს.
„მედიიდან გავიგეთ, რომ დასახელებული კომპანიებიდან ზოგიერთი ასევე გეგმავს სარჩელის შეტანას სასამართლოში.
იმედი გვაქვს, მოგვეცემა ჩვენი არგუმენტების წარდგენის შესაძლებლობა და სამართლიან შედეგს მივაღწევთ“, - აცხადებენ კომპანიაში.
მანამდე, კონკურენციის სააგენტოს გადაწყვეტილების შესაძლო გასაჩივრების შესახებ კომპანია „ვისოლმა“ განაცხადა.
შეგახსენებთ, რომ კონკურენციის ეროვნული სააგენტომ საავტომობილო საწვავის ბაზარზე, ხუთი ეკონომიკური აგენტის მიმართ წარმოებული მოკვლევა დაასრულა. სააგენტოს მიერ წარმოებული მოკვლევის შედეგად დადასტურდა - შპს „ლუკოილ-ჯორჯიას“, სს „ვისოლ პეტროლიუმ ჯორჯიას“, შპს ,,სან პეტროლიუმ ჯორჯიას“, შპს „სოკარ ჯორჯია პეტროლიუმის“ და შპს ,,რომპეტროლ საქართველოს“ მიერ „კონკურენციის შესახებ“ საქართველოს კანონის მე-7 მუხლის დარღვევა.
სააგენტოს გადაწყვეტილებით, ხუთ ეკონომიკურ აგენტს შესაბამისი ფინანსური სანქცია - ჯამში, 4 მილიონ ლარამდე დაეკისრა.
ასევე, ბაზარზე კონკურენტული გარემოს გაუმჯობესების მიზნით, შესასრულებლად აუცილებელი რეკომენდაცია გაიცა.
კანონმდებლობის შესაბამისად, სააგენტოს გადაწყვეტილების გასაჩივრება კომპანიებს შეუძლიათ ქ. თბილისის საქალაქო სასამართლოში.
იგივე თემაზე:
უახლესი
