საქართველოს პარლამენტმა 2025 წლის  ივნისის ბოლოს  დაამტკიცა საქართველოს  „შრომითი მიგრაციის შესახებ“ კანონში ცვლილებები, რომელიც უცხო ქვეყნის მოქალაქეების დასაქმების მიზნით ახალ რეგულაციებს აწესებს. 

აღნიშნულ ცვლილებებს მიმოიხილავს შპს „ბი ვი ქონსალთინგის“ მმართველი პარტნიორი ვახტანგ შურღაია: 

ახალი რეგულაციების გაცხადებული მიზანია შრომის ბაზრის დაცვა და არალეგალური დასაქმების შემთხვევების აღმოფხვრა. უპირველესად აღსანიშნავია, რომ აღნიშული რეგულაციების გამკაცრების შედეგად, უცხო ქვეყნის მოქალაქეებს საქართველოს ტერიტორიაზე დასაქმების უფლების მისაღებად დასჭირდებათ სპეციალური ნებართვის მოპოვება, რომელსაც გასცემს საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო. სწორედ აღნიშნული ნებართვის მოპოვების შედეგად უცხო ქვეყნის მოქალაქეებს ეძლევათ საშუალება ლეგალურად დასაქამდნენ საქართველოს ტერიტორიაზე. 

მნიშვნელოვანია აღინიშნოს, რომ  კანონში შეტანილი ცვლილებები ითვალისწინებს, როგორც  უცხო ქვეყნის მოქალაქისათვის ლეგალურად დასაქმების ნებართვის მოპოვების პროცედურებს, ისე ადგენს კონკრეტულ მოთხოვნებს და ვალდებულებებს დამსაქმებლებისათვის.

აღნიშნული საკანონმდებლო ცვლილებების თანახმად, უცხო ქვეყნის მოქალაქე უნდა აკმაყოფილებდეს შესაბამისი კვალიფიკაციის კრიტერიუმებს და ამასთან დამსაქმებლმა აუცილებლად უნდა დაადასტუროს, რომ საქართველოს ბაზარზე კონკრეტული სამუშაოს შესასრულებლად კადრები დეფიციტურია. ნებართვის მოპოვების მიზნით დამსაქმებელმა უნდა მიმართოს სამინისტროს უცხო ქვეყნის მოქალაქისათვის დასაქმების უფლების გაცემის ნებართვის მოსაპოვებლად, აღნიშული წესი განსხავდება თვითდასაქმებულების შემთხვევაში, ასეთ დროს განაცხადი შეაქვს თვითდასაქმების მსურველ უცხოელს. 

სამინსიტროს მიერ ნებართვის გაცემის შემდეგ, უცხო ქვეყნის მოქალაქემ უნდა მიმართოს შესაბამის საკონსულოს D1 კატეგორიის საიმიგრაციო ვიზის მისაღებად.  ამასთან, აღსანიშნავია, რომ აღნიშნული ნებართვის მოპოვებით, უცხო ქვეყნის მოქალაქეს ეძლევა უფლება დასაქმდეს მხოლოდ იმ ადგილობრივ დამსაქმებელთან, რომელმაც გააკეთა შესაბამისი განაცხადი სამინისტროში.  

აღსანიშნავია, რომ „შრომითი მიგრაციის შესახებ“ კანონში ცვლილებებთან ერთად, განისაზღვრა სანქციები კანონის მოთხოვნათა დარღვვევის შემთხვევეაში, რომლებიც ვრცელდება, როგორც ადგილობრივ დამსაქმებელზე ისე,  უცხო ქვეყნის მოქალაქეზე. შესაბამისად, კანონდარღვევის დადასტურება  გამოიწვევს როგორც დამსაქმებლის, ისე დასაქმებულის  დაჯარიმებას 2000 ლარის ოდენობით, ხოლო ასეთი ფაქტის განმეორებით გამოვლენის შემთხვევაში სანქციის ოდენობა იზრდება.