განსაკუთრებით კოვიდპანდემიის შემდგომ, უმაღლეს განათლებას პრაქტიკულად აღარ აქვს საზღვრები, ვინაიდან ხდება სრულად ერთიან სისტემაში მოქცევა, - ამის შესახებ განათლების მინისტრმა გიორგი ამილახვარმა „იმედის დილაში“ რუბრიკა Business Insider Georgia-ს ავტორ გიორგი აბაშიშვილთან საუბარში ბიზნესის ფაკულტეტისთვის სამწლიანი საბაკალავრო და ერთწლიანი სამაგისტრო სწავლების დაშვების საკითხის შეფასებისას განაცხადა.

„ჩვენ თუ არ აუწყობთ ფეხს საერთაშორისო გამოცდილებასა და პრაქტიკას, ძალიან რთული იქნება ჩვენი მხოლოდ ლოკალური პრაქტიკებით განვითარება. თქვენ კარგად მოგეხსენებათ, რამდენად განვითარებულია სამწლიანი საბაკალავრო და ერთწლიანი სამაგისტრო პროგრამები არა მხოლოდ ბიზნესის მიმართულებით.

ჩვენ არაერთი შეხვედრა გვქონდა უნივერსიტეტების წარმომადგენლებთან და პრინციპში იდეაც იქ დაიბადა. თავადაც უნივერსიტეტებსა და სტუდენტებს სურდათ, განსაკუთრებით პროფესორებს ბიზნესის მიმართულებით და მათთან ერთად დავიწყეთ ამ იდეაზე 6 თვის წინ მუშაობა და დღეს ეს პრაქტიკულად რეალიზებულია და შესაბამისი კანონი მიღებულია.

დავიწყეთ ბიზნეს განათლებით. რა თქმა უნდა უნივერსიტეტებს არ ეზღუდებათ ორწლიანი სამაგისტროსა და 4-წლიანი საბაკალავრო ფაკულტეტებზე სწავლება, ეს მათი სურვილია. თუმცა ასევე შეუძლიათ გააკეთონ სამწლიანი საბაკალავრო და ერთწლიანი სამაგისტრო პროგრამები. ეს არის პირველი ნაბიჯი ჩვენს სისტემაში, ამიტომ უნდა დავაკვირდეთ, თუმცა ვფიქრობ რომ ამას საკმაოდ პოზიტიური გამოხმაურება და მნიშვნელოვანი შედეგები ექნება. თუ ჩვენ შევხედავთ, რომ ესაა სწორი მეთოდი, მიდგომა და ჩვენ გავდივართ იმ მიზნებზე რაც გვინდა, შემდგომ უკვე შესაძლოა, მსგავსი მოდელის დანერგვაზე სხვა მიმართულებზეც ვიფიქროთ. ოთხწლიან ბაკალავრიატში არადარგობრივი მიმართულება ბევრი იყო და ამიტომ სწორი გადაწყვეტილება მივიღეთ“, - აღნიშნა გიორგი ამილახვარმა.