2023 წლის II კვარტლის მდგომარეობით, სებ-ის მონაცემებზე დაყრდნობით 15 ლიცენზირებული ბანკი ფუნქციონირებს. აქედან, ბოლო ლიცენზია გაიცა 2022 წლის 17 ნოემბერს „პეისერა ბანკი საქართველო"-ზე, თუმცა აღნიშნული ფინანსური ინსტიტუტი  აქტიურად არ ოპერირებს და მისი კონცეფციის შესახებ ფართო მასებში ჯერჯერობით არ არის ცნობილი, „პეისერამდე“ კი ბანკის ლიცენზია „კრედო ბანკს“, 2017 წლის 20 მარტს მიენიჭა.

საფინანსო ინსტიტუტები დიდ როლს თამაშობენ საქართველოში, ფინანსებთან ხელმისაწვდომობის უზრუნველყოფაში. აღნიშნულზე, მეტყველებს ბანკების მიერ გაცემული სასესხო პორტფელის მიმდინარე ღირებულება, რომელიც 2023 წლის მეორე კვარტლის მონაცემებით ჯამურად 48.2 მილიარდს შეადგენს, რაც 5 მილიარდით აღემატება 2022 წლის ანალოგიურ მაჩვენებელს ანუ გაზრდილია 10,6%.

ასევე, აღსანიშნავია, რომ 2023 წლის II კვარტლის მონაცემებით, სასესხო პორტფელის 55% ნომინირებულია საქართველოს ეროვნულ ვალუტაში, ლარში და შეადგენს 26.7 მილიარდს, სასესხო პორტფელის ზრდა ძირითადად დაკავშირებულია ლარის სესხების ზრდასთან. 2022 წლის მეორე კვარტალთან შედარებით ლარის სესხები გაზრდილია 17.3%-ით, უცხოურ ვალუტაში კი ზრდამ მხოლოდ 3.29% შეადგინა. აღსანიშნავია, რომ საქართველოს საბანკო საფინანსო ინსტიტუტებში გაცემული სესხების 81% სისტემურ 3 ბანკზე მოდის, თუმცა ანალიზს საჭიროებს დანარჩენი 19%, რომელზეც გარკვეული ფაქტორების გამო მომხმარებლები არჩევანს აკეთებენ. მიზიდულობს მიზეზი შეიძლება უამრავი იყოს, მაგრამ ძირითადად ეს შესაძლოა, უმეტესად გარკვეულ ფინანსურ სარგებელთან იყოს დაკავშირებული, რომლის შემოთავაზებაც სისტემურ ბანკებს არ შეუძლიათ. ასეთი შეიძლება იყოს შედარებით დაბალი საპროცენტო განაკვეთი, ნაკლები ან/და ნულოვანი საკომისო ხარჯები, უშუალო - პერსონიზირებული მომსახურება და სხვა.

Business Insider Georgia რუბრიკა Business Intelligence & Analytics-ის ფარგლებში წარმოგიდგენთ„კრედოს“, „ტერასა“ და „პროკრედიტ ბანკის“ ფინანსურ ანალიზს.  აღნიშნული ფინანსური ინსტიტუტების სასესხო პორტფელი ჯამურად 4.5 მილიარდ ლარს შეადგენს და მთლიანი სასესხო პორტფელის 9.3%-იანი წილი უჭირავთ. ყველაზე დიდი სასესხო პორტფელი ზემოთ ხსენებული ბანკებიდან „კრედო ბანკს    აქვს და ₾1.88 მილიარდს შეადგენს, მეორე ადგილზე „ტერა ბანკია“ ₾1.36 მილიარდი სასესხო პორტფელით, მესამე ადგილზე კი „პროკრედიტ ბანკი“ - ₾1.2 მილიარდით.