საქართველო და აშშ - ი მზად არიან, ურთიერთსასარგებლო სავაჭრო ურთიერთობები აქტიურად განავითარონ - ლევან დავითაშვილი
პირველი ვიცე-პრემიერი, ეკონომიკისა და მდგრადი განვითარების მინისტრი ლევან დავითაშვილი ამერიკის შეერთებული შტატების (აშშ) სავაჭრო წარმომადგენლის თანაშემწის მოადგილეს სილვია სავიჩს შეხვდა.
შეხვედრა აშშ - ში პირველი ვიცე-პრემიერის ვიზიტის ფარგლებში გაიმართა და მას ასევე დაესწრო მინისტრის მოადგილე გენადი არველაძე.
შეხვედრაზე განხილულ იქნა საქართველოსა და აშშ - ს შორის სავაჭრო ურთიერთობის პრიორიტეტული მიმართულებები, მათ შორის ქართულმა მხარემ დააყენა საკითხი "მაღალი დონის დიალოგი ინვესტიციებსა და ვაჭრობაზე" შეხვედრის გამართვასთან დაკავშირებით, რათა მოხდეს ორმხრივი ვაჭრობის და ინვესტიციებთან დაკავშირებული საკითხების განხილვა აღნიშნული ფორმატის ფარგლებში.
როგორც პირველმა ვიცე-პრემიერმა განაცხადა, აშშ - საქართველოს სავაჭრო ბრუნვა ყოველწლიურად მზარდი დინამიკით ხასიათდება - 2024 წელს აშშ საქართველოს უმსხვილეს სავაჭრო პარტნიორებს შორის მესამე იყო დაახლოებით 9-პროცენტიანი წილით. ამასთან, როგორც ლევან დავითაშვილმა აღნიშნა, საქართველო აშშ-ისთვის არა მარტო მნიშვნელოვანი სავაჭრო პარტნიორი ქვეყანაა, არამედ მას ჰაბის ფუნქციაც ეკისრება ამერიკიდან ექსპორტირებული პროდუქციის რეგიონის სხვა ქვეყნებში გადანაწილების კუთხით. მისი თქმით, ეს განსაკუთრებით ეხება მსუბუქ ავტომობილებს და გარკვეული სახის აგრო პროდუქციას, რომლებიც საქართველოს მეშვეობით ცენტრალური აზიისა და რეგიონის სხვა ქვეყნებში რეექსპორტის სახით გადის. აღსანიშნავია, რომ 2024 წელს 940 მლნ აშშ დოლარის მანქანების რეექსპორტი განხორციელდა.
საუბარი ასევე შეეხო აშშ-ს ახალი ადმინისტრაციის სატარიფო პოლიტიკას. მხარეები შეთანხმდნენ, რომ ამ მიმართულებით გააგრძელებენ ინფორმაციის გაცვლას. როგორც ლევან დავითაშვილმა აღნიშნა, ტარიფებთან დაკავშირებულ ცვლილებას აშშ - ში ექსპორტზე უმნიშვნელო გავლენა ექნება.
დასასრულს აღინიშნა, რომ შეერთებული შტატები, ისევე როგორც საქართველო მზად არიან აქტიურად განავითარონ ურთიერთსასარგებლო სავაჭრო ურთიერთობები.
სხვა სიახლეები
ავიაბილეთების დაჯავშნაში AI-ის გამოყენება მომხმარებელთა არჩევანზე უნდა იყოს დამოკიდებული - JetBlue-ს პრეზიდენტი
16.11.2026.19:00
ამერიკული ავიაკომპანია JetBlue Airways-ის პრეზიდენტის, განცხადებით, ავიაკომპანიებმა ხელოვნური ინტელექტის საშუალებით ავიაბილეთების დაჯავშნის საკითხში მომხმარებელთა მოთხოვნები უნდა გაითვალისწინონ.
მისი შეფასებით, მიუხედავად იმისა, რომ ხელოვნური ინტელექტის გამოყენებით ბილეთების დაჯავშნა გარკვეულ რისკებთან არის დაკავშირებული, ავიაკომპანიებმა მომხმარებლებს მათთვის სასურველი მომსახურების მიღების შესაძლებლობა უნდა მისცენ.
JetBlue-ს პრეზიდენტის განცხადება მოჰყვა United Airlines-ის გადაწყვეტილებას, მონაცემთა უსაფრთხოების მიზნით ხელოვნური ინტელექტის პროგრამებისთვის საკუთარ ციფრულ პლატფორმებზე წვდომა შეზღუდოს.
ამასთან, JetBlue-ს პრეზიდენტის შეფასებით, მსგავსი ტექნოლოგიების განვითარებამ შესაძლოა ავიაკომპანიებს დამატებითი ფინანსური ხარჯები შეუქმნას, თუ ბილეთების დაჯავშნის მომსახურების მიმწოდებლები მომავალში საკომისიოს დაწესებას გადაწყვეტენ.
მიუხედავად ამისა, JetBlue მიიჩნევს, რომ ავიაკომპანიებმა ტექნოლოგიური ცვლილებების მიმართ მოქნილობა უნდა შეინარჩუნონ და მომსახურება მომხმარებელთა მოთხოვნებს მოარგონ.