ახლო აღმოსავლეთში მიმდინარე ომი ყურის ქვეყნებში სასიცოცხლოდ მნიშვნელოვანი მედიკამენტების მიწოდებას აფერხებს. დარგის წარმომადგენლების განცხადებით, საფრთხე ემუქრება სიმსივნის საწინააღმდეგო პრეპარატებისა და სხვა იმ მკურნალობისთვის საჭირო წამლების მომარაგების გზებს, რომლებიც მაცივარში შენახვას საჭიროებს. შექმნილი ვითარება კომპანიებს აიძულებს, შეცვალონ ფრენის მარშრუტები და რეგიონში ტვირთების შესატანად სახმელეთო გზები მოძებნონ. აღნიშნულის შესახებ ინფორმაციას reuters-ი ავრცელებს.

კონფლიქტმა, რომელიც ორი კვირის წინ მნიშვნელოვნად გამწვავდა მწყობრიდან გამოიყვანა ძირითადი საჰაერო სატრანზიტო ჰაბები და ჩაკეტა საზღვაო გზები. ამან გამოიწვია მრავალი პროდუქტის, მათ შორის მედიკამენტების, საკვებისა და ნავთობის გადაადგილების შეფერხება.

თუმცა, როგორც ზოგიერთი ხელმძღვანელი პირი აცხადებს, მიუხედავად იმისა, რომ მწვავე დეფიციტის ნიშნები ჯერჯერობით ნაკლებად შეიმჩნევა, ვითარება შესაძლოა შეიცვალოს, თუ კონფლიქტი დროში გაიწელება. ყურის ქვეყნები დიდწილად იმპორტზე არიან დამოკიდებულნი, ზოგიერთ მედიკამენტს კი შენახვის მოკლე ვადა აქვს და საჭიროებს „ცივი ჯაჭვის“  პრინციპით შენახვას, რაც ხანგრძლივ სახმელეთო გადაზიდვებს ნაკლებად პრაქტიკულს ხდის.

დასავლური ფარმაცევტული კომპანიების წარმომადგენლებმა აღნიშნეს, რომ ყურის ქვეყნებში ტვირთების შესატანად ალტერნატიულ გზებს ეძებენ; ზოგიერთი მედიკამენტი კი სახმელეთო გზით, სატვირთო ავტომობილებით გადააქვთ საუდის არაბეთის ისეთი აეროპორტებიდან, როგორიცაა ჯედა და ერ-რიადი. სხვა შესაძლო ვარიანტებად სტამბოლი და ომანი განიხილება.

რეგიონის უმსხვილესი აეროპორტები, მათ შორის დუბაის, აბუ-დაბისა და დოჰას საჰაერო ნავსადგურები, დაიხურა ირანის მიერ განხორციელებული დარტყმების გამო, რაც პასუხი იყო აშშ-ისა და ისრაელის თავდასხმებზე. დუბაი და დოჰა მთავარ სატვირთო ჰაბებს წარმოადგენენ, რომლებიც ევროპას აზიასა და აფრიკასთან აკავშირებენ. სწორედ აქ ოპერირებენ ისეთი ავიაკომპანიები, როგორიცაა Emirates და Etihad, ასევე ლოგისტიკური კომპანია DHL, რომლებიც მუშაობენ ტემპერატურისადმი მგრძნობიარე მედიკამენტებზე; ამ პრეპარატებისთვის ტემპერატურული რეჟიმის მკაცრი დაცვა გადამწყვეტია მათი უსაფრთხოებისა და ეფექტურობის შესანარჩუნებლად.

ანტვერპენის მენეჯმენტის სკოლის პროფესორი, ვოუტერ დეულფი, დარგობრივ მონაცემებზე დაყრდნობით აცხადებს, რომ გლობალური საჰაერო ტვირთების, რაც კრიტიკული მედიკამენტებისა და ვაქცინების მიწოდების მთავარი გზაა მეხუთედზე მეტი ახლო აღმოსავლეთში შექმნილი შეფერხებების რისკის ქვეშაა.

ალტერნატიული „ცივი ჯაჭვის დერეფნების“ ან ტემპერატურის კონტროლის მქონე იმ მარშრუტების მოწყობა, რომლებიც მგრძნობიარე მედიკამენტებისთვის გამოიყენება, ერთ ღამეში შეუძლებელია და ისინი ყოველთვის ხელმისაწვდომი არ არის.

სხვა ფარმაცევტული კომპანიის ხელმძღვანელმა აღნიშნა, რომ მათ შექმნეს შიდა ჯგუფები პაციენტებისთვის კრიტიკულად მნიშვნელოვანი ტვირთების, მათ შორის სიმსივნის საწინააღმდეგო პრეპარატების პრიორიტეტულად გადასაზიდად. მანვე გააფრთხილა მხარეები, რომ ტემპერატურული რეჟიმის მქონე ზოგიერთმა ტვირთმა შესაძლოა ვერ მიაღწიოს დანიშნულების ადგილს გადაჯდომის წერტილებში, თუკი სათანადო შენახვისა და დამუშავების პირობები უზრუნველყოფილი არ იქნება.

სამედიცინო მოწყობილობების მწარმოებელი კომპანიის წარმომადგენლის განცხადებით, პირველი ნაბიჯი ტრანზიტში მყოფი ან გასამგზავრებლად გამზადებული ტვირთების აღრიცხვაა, რის შემდეგაც უნდა გადაწყდეს, რომელი პალეტები საჭიროებს მარშრუტის შეცვლას და გახდება თუ არა საჭირო ახალი გადაზიდვების დაგეგმვა.