ლევან დავითაშვილი აშშ-ში ვიზიტის ფარგლებში საერთაშორისო საფინანსო კორპორაციის რეგიონალურ ვიცე-პრეზიდენტს შეხვდა
პირველი ვიცე-პრემიერი, ეკონომიკისა და მდგრადი განვითარების მინისტრი ლევან დავითაშვილი საერთაშორისო საფინანსო კორპორაციის (IFC) რეგიონალურ ვიცე-პრეზიდენტს, ალფონსო გარსია მორას შეხვდა. შეხვედრა პირველი ვიცე-პრემიერის ამერიკის შეერთებულ შტატებში ვიზიტის ფარგლებში გაიმართა.
შეხვედრაზე განხილული იყო საერთაშორისო საფინანსო კორპორაციის საქმიანობა საქართველოში და მიმდინარე და სამომავლო პროექტები. ყურადღება გამახვილდა კორპორაციის პრიორიტეტებზე ქვეყნის კერძო სექტორის დაფინანსების კუთხით ისეთ სექტორებში, როგორიცაა ენერგეტიკა, მრეწველობა, ტრანსპორტი და დაკავშირებადობა, შუა დერეფნის შემდგომი განვითარება და სხვ.
შეხვედრაში მონაწილეობდა ფინანსთა მინისტრი ლაშა ხუციშვილი, მას ასევე დაესწრნენ ეკონომიკისა და მდგრადი განვითარების მინისტრის მოადგილეები გენადი არველაძე და ვახტანგ ცინცაძე, ფინანსთა მინისტრის პირველი მოადგილე გიორგი კაკაურიძე და მინისტრის მოადგილე ეკატერინე გუნცაძე, აგრეთვე საქართველოს ეროვნული ბანკის პირველი ვიცე-პრეზიდენტი ეკატერინე მიქაბაძე.
როგორც შეხვედრაზე პირველმა ვიცე-პრემიერმა განაცხადა, საქართველოს საერთაშორისო საფინანსო კორპორაციასთან თანამშრომლობის დიდი ხნის წარმატებული ისტორია აქვს. ამავე დროს, მისი თქმით, კორპორაცია ქართულ მხარესთან კოორდინაციით განიხილავს რამდენიმე პრიორიტეტული მიმართულებით საქმიანობას. ლევან დავითაშვილის ინფორმაციით, ერთერთია მცირე და საშუალო საწარმოების დაკრედიტება კონკრეტული პრიორიტეტული მიმართულებებით. მას საერთაშორისო საფინანსო კორპორაციის დაფინანსებით საქართველოში არსებული ბანკები განახორციელებენ.
„მეორე მიმართულებაა უფრო მსხვილი პროექტები ცალკეულ პრიორიტეტულ დარგებში, რომელთაც უშუალოდ კორპორაცია დააფინანსებს. საუბარია კერძო და არა საჯარო სექტორის დაფინანსებაზე. გამოიკვეთა კონკრეტული მიმართულებები - ძირითადად, საუბარია ენერგოპროექტებზე, რომელთაც კერძო კომპანიები განახლებადი ენერგეტიკის კუთხით განავითარებენ. კიდევ მიმართულება, სადაც საერთაშორისო საფინანსო კორპორაციასთან ასევე საინტერესო თანამშრომლობა იგეგმება, წარმოებების ხელშეწყობა და განვითარებაა. მათ შორის, ისეთი მსხვილი ინდუსტრიული დარგების, როგორიცაა მინერალური სასუქების წარმოება, ქიმიური მრეწველობა," - აღნიშნა ლევან დავითაშვილმა.
შეხვედრაზე ასევე აქცენტი გაკეთდა საერთაშორისო საფინანსო კორპორაციის მხრიდან ისეთი პროექტების მხარდაჭერაზე, რომლებიც გაზრდის საქართველოს, როგორც ციფრული ჰაბის როლს. კერძოდ, საუბარია ახალი სატელეკომუნიკაციო ინფრასტრუქტურის დაფინანსებაზე. „ჩვენ ამ კუთხითაც ვხედავთ კერძო ინვესტიციების დიდ პოტენციალს. კორპორაცია ამ სექტორშიც კერძო ინვესტიციების მხარდამჭერი იქნება," - აღნიშნა ლევან დავითაშვილმა.
შეხვედრაზე ხაზი გაესვა იმას, რომ საერთაშორისო საფინანსო კორპორაციის მხარდაჭერილი პროექტები ხელს შეუწყობს საქართველოს ეკონომიკის მეტად განვითარებას, შექმნის ახალ სამუშაო ადგილებს და გაზრდის ქვეყნის კონკურენტუნარიანობას.
დღის ტოპ 10 სიახლე
სხვა სიახლეები
19.06.2025.13:47
გაერთიანებულ სამეფოს ქალაქ ლონდონში The Wall Street Journal CEO Council Summit გაიმართა. ფორუმი დღეისათვის წარმოადგენს ერთ-ერთ ყველაზე პრესტიჟულ საერთაშორისო ბიზნეს ღონისძიებას და მასში მონაწილეობენ მსოფლიოს წამყვანი კომპანიების აღმასრულებელი დირექტორები და გლობალური ინვესტორები.
წელს ფორუმის მხარდამჭერი პარტნიორი იყო სააგენტო „აწარმოე საქართველოში“.
სააგენტოს დირექტორმა მიხეილ ხიდურელმა ღონისძიების მონაწილეებს საქართველოს საინვესტიციო პოტენციალი გააცნო.
„მნიშვნელოვანია, რომ საერთაშორისო ბიზნეს საზოგადოებამ მეტი იცოდეს საქართველოს არსებული შესაძლებლობების შესახებ. The Wall Street Journal CEO Council Summit-ი, ტრადიციულად, თავს უყრის მსოფლიოს წამყვანი კომპანიების პირველ პირებს. ამ ტიპის ღონისძიებებში მონაწილეობა გვაძლევს უნიკალურ შესაძლებლობას პირისპირ ვესაუბროთ გლობალურ ინვესტორებს საქართველოს პოტენციალზე“, - განაცხადა ეკონომიკისა და მდგრადი განვითარების სამინისტროს სსიპ სააგენტოს „აწარმოე საქართველოში“ დირექტორმა მიხეილ ხიდურელმა.
როგორც სააგენტოს ხელმძღვანელმა აღნიშნა, CEO სამიტის ფარგლებში, გაიმართა შეხვედრები მსხვილი კორპორაციების ხელმძღვანელებთან და პოტენციურ ინვესტორებთან. „სამიტზე წარმოდგენილნი იყვნენ ისეთი საერთაშორისო კორპორაციები როგორებიცაა Netflix, Rolls-Royce, SAP და სხვ. შეხვედრების ფორმატში წამყვანი კომპანიის ხელმძღვანელებს, მათ შორის Accenture-სა და Dow Jones-ის პირველ პირებს, მივაწოდეთ ინფორმაცია საქართველოს ეკონომიკური ტენდენციების, მათ შორის, რეგიონში გამორჩეული მაღალი ეკონომიკური ზრდის ტემპისა და ბოლო 4 წლის განმავლობაში 7 მილიარდ აშშ დოლარამდე მოზიდული პირდაპირი უცხოური ინვესტიციების შესახებ. ასევე, ვისაუბრეთ IT და BPO სექტორებში მიღწეულ შედეგებზე. დღეს მსოფლიოში წამყვანი კომპანიები EPAM, Viber, TP და Concentrix უკვე ოპერირებენ საქართველოში და ათასობით ადამიანს ასაქმებენ,“ - აღნიშნა მიხეილ ხიდურელმა.