ევროპის რეკონსტრუქციისა და განვითარების ბანკმა (EBRD) პოლონეთის ეკონომიკური ზრდის პროგნოზები წინა, ივნისში გამოქვეყნებული პროგნოზების დონეზე დატოვა და ელოდება, რომ ქვეყნის ეკონომიკა 2026 წელს 3.5%-ით გაიზრდება, ხოლო 2027 წელს ზრდის ტემპი 2.8%-მდე შენელდება.

ბანკის უახლეს ანგარიშში „რეგიონული ეკონომიკური პერსპექტივები“ (Regional Economic Prospects)  აღნიშნულია პოლონეთის ეკონომიკის მდგრადი დინამიკა, რომელსაც ხელს უწყობს მაღალი საინვესტიციო აქტივობა და ევროკავშირის (EU) სახსრების ათვისების გაგრძელება. ეკონომიკურმა ზრდამ 2025 წელს 3.6% შეადგინა, ხოლო 2026 წლის პირველ ნახევარში წლიურმა ზრდამ 3.5% შეადგინა.

პოლონეთი ცენტრალური ევროპის ქვეყნებსა და ბალტიისპირეთის სახელმწიფოებს შორის ერთ-ერთ ყველაზე სწრაფად მზარდ ეკონომიკად რჩება, სადაც 2026 წლისთვის საშუალო ზრდა 2.9%-ია პროგნოზირებული. პოლონეთის ეკონომიკამ ისარგებლა ძირითადი კაპიტალის მთლიანი ფორმირების ზრდით, რომელმაც 2026 წლის პირველ ნახევარში 2023 წლის შემდეგ ყველაზე მაღალი ზრდა აჩვენა.

აგვისტოს ბოლომდე მოქმედმა საწვავის ფასების დროებითმა ზომებმა ინფლაციური ზეწოლის შეკავებას შეუწყო ხელი, მიუხედავად გარე შოკებისა, მათ შორის ახლო აღმოსავლეთში გეოპოლიტიკური დაძაბულობის შედეგად ენერგიის ფასების ზრდისა. 2026 წლის აგვისტოში ინფლაციამ 3.4% შეადგინა და პოლონეთის ეროვნული ბანკის მიზნობრივი მაჩვენებლის დასაშვებ დიაპაზონში დარჩა. მონეტარული პოლიტიკის განაკვეთი უცვლელია მას შემდეგ, რაც ის ბოლოს, მარტში, შემცირდა.

ამასთან, გარე რისკები მათ შორის მოთხოვნის შემცირება ევროზონაში, რომელიც პოლონეთისთვის ყველაზე მნიშვნელოვანი საექსპორტო ბაზარია, და ახლო აღმოსავლეთში კონფლიქტის გამო ენერგიის ფასების ხანგრძლივად მაღალ დონეზე შენარჩუნება ეკონომიკური ზრდის გაგრძელებისთვის უარყოფით რისკებს ქმნის.  

EBRD პოლონეთში ერთ-ერთი წამყვანი ინსტიტუციური ინვესტორია. 2025 წელს ბანკმა ქვეყანაში 44 პროექტის ფარგლებში €1.35 მილიარდზე მეტი დააბანდა, რომლის 74% განახლებადი ენერგიის, ენერგიის შენახვის, ენერგოეფექტურობისა და მდგრადი ინფრასტრუქტურის მიმართულებებს მოხმარდა. 1991 წელს პოლონეთში საქმიანობის დაწყებიდან EBRD-ს ქვეყანაში €17 მილიარდზე მეტი აქვს ინვესტირებული.