აშშ-ის მაისის ინფლაციის მონაცემებმა აჩვენა, რომ სამომხმარებლო ფასები მოსალოდნელზე ნაკლებად გაიზარდა — საერთო სამომხმარებლო ფასების ინდექსი (CPI) თვეში მხოლოდ 0.1%-ით და წლიურად 2.4%-ით გაიზარდა. ამის შესახებ თიბისი კაპიტალის მიერ მომზადებულ პუბლიკაციაშია აღნიშნული.

ირკვევა, რომ საბაზისო CPI ინდექსი, რომელიც არ მოიცავს საკვებისა და ენერგიის ფასებს და ფედერალური რეზერვისთვის მთავარი ინდიკატორია, ასევე გაიზარდა თვეში 0.1%-ით და წლიურად 2.8%-ით— ორივე მაჩვენებელი პროგნოზებზე დაბალია. ენერგეტიკის ფასებმა კლება განაგრძო, განსაკუთრებით აღსანიშნავია ბენზინის 2.6%-იანი ვარდნა, ხოლო ისეთი ძირითადი საქონლის ფასები, როგორებიცაა ავტომობილები და ტანსაცმელი, ასევე შემცირდა. ამავდროულად, საკვების და საცხოვრებლის ფასებმა ზომიერად მოიმატა, ხოლო რეალურმა ხელფასებმა თვეში 0.3%-იანი ზრდა აჩვენა. მიუხედავად იმისა, რომ ტრამპის ადმინისტრაციამ აპრილში ფართომასშტაბიანი ტარიფები გამოაცხადა, მათ სამომხმარებლო ფასებზე ჯერ კიდევ არ მოუხდენიათ საგრძნობი გავლენა, თუმცა სავაჭრო დაძაბულობა რჩება.

„ეს რბილი ინფლაციური მაჩვენებელი მნიშვნელოვანი სიგნალია ინვესტორებისა და ბაზრებისთვის. მოსალოდნელზე დაბალი ინფლაცია ამცირებს ფედერალურ რეზერვზე ზეწოლას განაკვეთის აწევის კუთხით და აძლიერებს არგუმენტს განაკვეთის შემცირების სასარგებლოდ, რათა ეკონომიკა მხარდაჭერილი იყოს. ბაზრებმა მონაცემებზე დადებითად მოახდინეს რეაგირება — საფონდო ფიუჩერსები გაიზარდა, სახაზინო ობლიგაციების შემოსავლიანობა კი დაეცა. თუმცა, რჩება გაურკვევლობა: თუ ტარიფებით გამოწვეული ინფლაცია მოგვიანებით გაჩნდება, შესაძლოა ამ ეტაპზე არსებული მშვიდი მოლოდინები დაირღვეს. ფედერალური რეზერვი სავარაუდოდ ფრთხილი დარჩება და ამ კვირაში განაკვეთის შემცირებას არ დაგეგმავს“, - განმარტავენ თიბისი კაპიტალში.