ჩვენი 2025 წლის მეორე ნახევრის მოლოდინების მიმოხილვაში ერთ-ერთ მთავარ თემად დავასახელეთ ე.წ. “შესანიშნავი შვიდეულის”- Microsoft Corporation (MSFT), Alphabet Inc., (GOOGL) Amazon.com, Inc. (AMZN), Meta Platforms, Inc. (META), NVIDIA Corporation (NVDA), Apple Inc. (AAPL), Tesla, Inc. (TSLA)- აქციების ფასების კორექციის რისკი.

იქიდან გამომდინარე, რომ აქციების ბაზრის ბოლოდროინდელი ზრდის ძირითადი მამოძრავებელი ძალა სწორედ აღნიშნული ტექნოლოგიური გიგანტების ჯგუფი იყო, გაჩნდა ეჭვი იმის შესახებ, თუ რამდენად შენარჩუნდებოდა ზემოთხსენებული 7 კომპანიის დომინაცია და ბაზრის მაღალი კონცენტრაცია.

შესაბამისად, ჯგუფს უფრო სელექციურად მივუდექით და რეიტინგის სისტემა შევიმუშავეთ, რომლის საფუძველზეც „შესანიშნავი შვიდეული“-დან გამოვლინდა კომპანიები, რომლებიც როგორც რაოდენობრივი, ისე თვისობრივი მაჩვენებლებით გამოირჩევიან.

კვლევის ფარგლებში, კომპანიები შევადარეთ შემოსავლისა და მოგების ზრდით, ფინანსური მდგრადობით, აქციის ფასის სტაბილურობითა და სხვა ძირითადი მაჩვენებლებით. ასევე გავაანალიზეთ მათზე მოქმედი ფაქტორები, როგორებიცაა სავაჭრო კონფლიქტები, რეგულაციები, კონკურენცია და სხვა.

ფაქტორებს შესაბამისი წონა მიენიჭა, რაც თითოეულ კომპანიაზე დაბალანსებულ სურათს და 360 გრადუსიან ხედვას იძლევა.

შედეგები

#1 MSFT

ჩვენი ანალიზის მიხედვით „შესანიშნავი შვიდეულის“ კომპანიებს შორის Microsoft-ი პირველ ადგილს იკავებს. ჯგუფში არცერთ კომპანიას არ გააჩნია მსგავსი კომბინაცია სტაბილურობის, პროდუქტის მრავალფეროვნების, ხელოვნური ინტელექტის ინტეგრაციისა და გრძელვადიან ტექნოლოგიურ ტენდენციებში სტრატეგიული პოზიციონირების კუთხით. ტექნოლოგიურ გიგანტებს შორის, Microsoft-ის აქციას ყველაზე დაბალი მერყეობა და საბაზრო ბეტა ახასიათებს, რაც ინვესტორების ნდობასა და ბიზნესის მდგრადობაზე მიუთითებს.

გარდა ამისა, OpenAI-სთან პარტნიორობისა და შიდა წარმოების ჩიპის პროექტის (Maia) სახით, Microsoft-ს AI მიმართულებით მნიშვნელოვანი კონკურენტული უპირატესობა აქვს.

#2 GOOGL

რეიტინგის ფარგლებში, Alphabet-ი მეორე ადგილს იკავებს, რაც განპირობებულია პროდუქტების დაბალანსებული პორტფელით, სტაბილური ზრდითა და ხელოვნური ინტელექტის ინტეგრაციის პერსპექტივით.

ზრდა ყველა ძირითად სეგმენტში გრძელდება. საძიებო სერვისების შემოსავალი წელიწადში 12%-ით გაიზარდა, რაც მოლოდინებს კვლავ აჭარბებს, მიუხედავად შიშებისა იმის შესახებ, რომ გენერაციულმა AI-მ შესაძლოა ტრადიციული ძებნის ბიზნესი დააზიანოს.

კომპანიის გრძელვადიანი სტრატეგიული ინვესტიციებიც ძალაში რჩება: DeepMind, Waymo, Verily და Isomorphic Labs ჯერ მატერიალურ შემოსავალს არ აგენერირებენ, თუმცა ისინი უზრუნველყოფენ წვდომას ისეთ მოწინავე სფეროებზე, როგორებიცაა რობოტიკა და ა.შ.

#3 AMZN

Amazon-ი, რომელიც ჩვენს სიაში მესამე ადგილზეა, თვისობრივად და მომგებიანობის მაჩვენებლების ზრდის ტემპით გამორჩეულია. ის „შესანიშნავ შვიდეულში“ ერთ-ერთი ყველაზე დივერსიფიცირებული ბიზნესია, რომელიც გარდა ელ. კომერციისა, ასევე ჯანდაცვის, მედიის, სამომხმარებლო მოწყობილობებისა და ღრუბლოვანი სერვისების სეგმენტებშიც ოპერირებს.

განსაკუთრებით შთამბეჭდავია, რომ Amazon-ის ხელოვნური ინტელექტით მართული რობოტების პლატფორმა ახლა უკვე მომხმარებლების შეკვეთების დაახლოებით 75%-ს ამუშავებს.

გარდა ამისა, ხელოვნური ინტელექტის ინფრასტრუქტურის მიმართულებით, ამაზონი სტრატეგიულ ნაბიჯებს დგამს ვერტიკალური კონტროლის მოსაპოვებლად. Project Rainer-ი მრავალწლიანი ინიციატივაა, რომლის მიზანიც ღრუბლოვან ეკოსისტემაში Amazon-ის საკუთარი ჩიპების (Trainium და Inferentia) ინტეგრაციაა.

#4 NVDA

მართალია, Nvidia ჩვენს რეიტინგში მეოთხე ადგილზეა, მისი უნიკალური ზრდისა და დომინანტური კონკურენტული პოზიციის გამო. თუმცა, აქციის ფასის მერყეობისა და სხვა რისკების გათვალისწინებით, ჩვენს ფავორიტებს მიღმა რჩება.

ზრდის თვალსაზრისით, Nvidia სრულიად განსხვავებულ ლიგაშია. კომპანია გლობალური AI აქსელერატორების ბაზრის დაახლოებით 90%-ს ფლობს, ხოლო მისი კვარტალური შემოსავლებისა და აქციის მოგების ზრდა მუდმივად მნიშვნელოვნად უსწრებს „შესანიშნავი შვიდეულის“ ყველა წევრს.

თუმცა, ამ გამორჩეული ზრდის ფონზე, Nvidia „შესანიშნავ შვიდეულში“ შემავალი კომპანიების აქციებთან შედარებით ერთ-ერთ ყველაზე მაღალ მულტიპლიკატორებზე ივაჭრება, რაც ფასის კორექციის რისკებს ზრდის.

გარდა ამისა, Nvidia-ს ბიზნესი დიდწილად ერთ ტენდენციაზეა დამოკიდებული — გრაფიკული ბარათების (GPU) გაყიდვებზე ხელოვნური ინტელექტისა და გამოთვლითი დატვირთვებისთვის, რაც შემოსავლების კონცენტრაციის რისკსაც აჩენს.

#5 META

Meta ჩვენს რეიტინგში დაბალ პოზიციას იკავებს — არა რაიმე გამორჩეულად სუსტი წერტილის არსებობის, არამედ შემოსავლების ბაზის კონცენტრაციისა და შედარებით დაბალი AI მონეტიზაციის გამო.

Meta ფუნდამენტურად ერთი სეგმენტის ბიზნესია, რადგან მისი შემოსავლების 98% დღემდე ციფრულ სარეკლამო სეგმენტზე მოდის.

AI-ის მიმართულებით, მონეტიზაცია ჯერ კიდევ საწყის ეტაპზეა, თუმცა, ხელოვნური ინტელექტის გაძლიერებული გუნდისა და მიმდინარე ინფრასტრუქტურული ინვესტიციების ფონზე, კომპანია ზრდის პოტენციალს, რომ დროთა განმავლობაში უფრო მიმზიდველი გახდეს.

#6 AAPL

Apple ჩვენს ანალიზში მეექვსე ადგილს იკავებს, რაც გამოწვეულია კომპანიის შენელებული ზრდის დინამიკით, ხელოვნური ინტელექტის მონეტიზაციის გაურკვეველი პერსპექტივებით და იმით, რომ მისი შემოსავლები კვლავაც ძლიერად კონცენტრირებულია სამომხმარებლო მოწყობილობებზე.

ჩვენი ანალიზის ფარგლებში, რომელიც აქცენტს ზრდაზე, დივერსიფიკაციასა და სეკულარულ ტენდენციებზე აკეთებს, Apple კონკურენტებთან შედარებით ნაკლებად მიმზიდველია.

ბოლო კვარტალებში კომპანიის შემოსავლების ზრდა შენელდა, რაც iPhone-ის, Mac-ისა და iPad-ის გაყიდვების შემცირებას უკავშირდება.

გარდა ამისა, Apple-ის ამჟამინდელი სტრატეგიული პოზიციონირება ხელოვნური ინტელექტის სფეროში მკვეთრად ჩამოუვარდება კონკურენტებს, როგორებიცაა Microsoft-ი, Google-ი და Amazon-ი.

#7 TSLA

ჩვენი რეიტინგის ფარგლებში, Tesla ბოლო პოზიციას იკავებს. მიუხედავად იმისა, რომ კომპანიას ამბიციური გრძელვადიანი ხედვა აქვს, მისი ამჟამინდელი ფუნდამენტური მაჩვენებლები ვეღარ ამყარებს იმ ნარატივს, რომელიც წარსულში მისი აქციის ფასის ზრდას ხსნიდა.

შემოსავლების ზრდა მკვეთრად შენელდა, რაც ისეთი კომპანიისთვის, რომელიც ზრდაზე ორიენტირებულ (Growth) აქციად აღიქმება - საყურადღებოა.

Tesla გაძლიერებულ კონკურენციას აწყდება ელექტრო მანქანების ბაზარზე — განსაკუთრებით ჩინური მწარმოებლების, მაგალითად BYD-ის მხრიდან, რომლებიც სწრაფად იზრდებიან გლობალურ ბაზრებზე.

მიუხედავად იმისა, რომ Optimus-ის — ჰუმანოიდი რობოტის პროექტი — უნიკალურ სეგმენტს წარმოადგენს, მის გარშემო ჯერ არც კონკრეტული ვადებია განსაზღვრული და არც მონეტიზაციის მექანიზმია გამოკვეთილი.

გარდა ამისა, Tesla-ს შემოსავლების დამოკიდებულება მომხმარებლის ციკლურ დანახარჯებზე, მას მაკროეკონომიკური გარემოს გაუარესების მიმართ განსაკუთრებით მოწყვლადს ხდის.

“შესანიშნავი შვიდეულის” აქციების შეძენას შეძლებ აქ. 

გაითვალისწინე, ეს არ არის ფინანსური რჩევა.

სამართლებრივი შეტყობინება

შპს „თიბისი კაპიტალის“ მიერ ამ არხით მოწოდებული ინფორმაცია ემსახურება მხოლოდ საინფორმაციო მიზნებს. წინამდებარე ინფორმაცია არ არის დამტკიცებული რომელიმე მარეგულირებელი ორგანოს მიერ და არ უნდა ჩაითვალოს ოფიციალურად. აქ მოცემული ინფორმაცია არ უნდა იქნას აღქმული როგორც საინვესტიციო, იურიდიული ან საგადასახადო რჩევა. ის ასევე არ წარმოადგენს ფინანსური ინსტრუმენტის ყიდვის, გაყიდვის ან ფლობისკენ მოწოდებას ან რეკომენდაციას.

ფინანსურ ბაზრებზე ინვესტირება დაკავშირებულია მნიშვნელოვან რისკთან, მათ შორის, დაბანდებული ძირითადი თანხის სრულად დაკარგვის შესაძლებლობასთან. წარსული შედეგები არ წარმოადგენს მომავალი შედეგების სანდო ინდიკატორს. ეს არხი არ იძლევა ყველა პოტენციური რისკის შეფასებას; ნებისმიერ პოტენციურ ინვესტიციასთან დაკავშირებული ყველა რისკის იდენტიფიცირება და შეფასება წარმოადგენს თქვენს პირად პასუხისმგებლობას.

ნებისმიერი საინვესტიციო გადაწყვეტილების მიღებამდე თქვენ უნდა ჩაატაროთ დამოუკიდებელი კვლევა და სრულყოფილი due diligence (სათანადო გულმოდგინება). ყოველთვის გაიარეთ კონსულტაცია თქვენს პროფესიონალ ფინანსურ, იურიდიულ და საგადასახადო მრჩევლებთან. ამ ინფორმაციის მიღებით, თქვენ ეთანხმებით, რომ შპს „თიბისი კაპიტალი“, მისი აფილირებული პირები და მათი წარმომადგენლები თავისუფლდებიან ნებისმიერი და ყოველგვარი პასუხისმგებლობისგან ნებისმიერი პირდაპირი თუ არაპირდაპირი ზიანისთვის, რომელიც შეიძლება წარმოიშვას ამ ინფორმაციის გამოყენებით ან მასზე დაყრდნობით.