გიზიარებთ ბლოგს: აპრილის თვეში ბაზრის მერყეობის შემდეგ, რომელიც ტარიფების გამოცხადებითა და აშშ-ჩინეთის სავაჭრო დაპირისპირების გამწვავებით იყო განპირობებული, კაპიტალის ბაზარი მაისის ვარდნის მიუხედავად აღდგენას იწყებს. S&P 500 ინდექსი უკვე ზედიზედ 6 სავაჭრო დღის განმავლობაში აღმასვლას ახერხებს და ოპტიმისტური რეიტინგის (,,bull”) პერსპექტივას უახლოვდება. ამ ტენდენციის მთავარი მიზეზი აშშ-სა და მის სავაჭრო პარტნიორებს შორის ურთიერთობების გაუმჯობესება და რამდენიმე მნიშვნელოვანი შეთანხმებაა, განსაკუთრებით დიდ ბრიტანეთსა და ჩინეთთან.

Moody’s-ის მიერ აშშ-ის საკრედიტო რეიტინგის შემცირების მიუხედავად, ინდექსმა ზრდა ორშაბათსაც გააგრძელა - თუმცა, მოლოდინები საპირისპირო იყო. ეს წელს უკვე მეორე შემთხვევაა, როდესაც S&P 500 ინდექსმა მნიშვნელოვანი თანმიმდევრული ზრდა აჩვენა - პირველად ეს აპრილის ბოლოს მოხდა, როდესაც ინდექსმა 9-დღიანი ზრდის სერია დააფიქსირა.

ბოლო პერიოდის დინამიკა ინვესტორთა მზარდ ოპტიმიზმს ასახავს, თუმცა გარკვეული სკეპტიციზმიც იჩენს თავს - ბევრი კითხვის ნიშნის ქვეშ აყენებს ფასების ზრდას მოცემული ეკონომიკური მდგომარეობის ფონზე. მიუხედავად ინდექსის სწრაფი აღდგენისა, ბაზრების მომავალი ჯერ კიდევ ბუნდოვანია.

ფედერალური რეზერვის მიდგომა - გეგმიურად აღარ შეამციროს საპროცენტო განაკვეთები და დააკვირდეს მოვლენების განვითარებას - მიანიშნებს, რომ ინფლაციის მოლოდინები უარესდება. ამას ემატება მომხმარებელთა და ბიზნესის მოლოდინების შესუსტება, რაც S&P 500 ინდექსთან დაკავშირებულ რისკებს კიდევ უფრო ზრდის.

*გაითვალისწინე, რომ ეს არ არის ფინანსური რჩევა.

თვალი ადევნე ბაზრის დინამიკას თიბისის მობაილბანკის საინვესტიციო პლატფორმაზე