ტაბაწყურის მიმართულებით დავამატეთ სათავგადასავლო ტურები, - ამის შესახებ Business Insider Georgia-სთან სასტუმრო ბაკურიანი ინნ • Bakuriani Inn-ის მფლობელი კომპანია Inn Hospitality-ს კომერციულმა დირექტორმა ნინა გაჩეჩილაძემ განაცხადა. მისივე თქმით, განახლდა სასტუმროს ტექნიკური ინფრასტრუქტურაც.

„2025 წლის მაღალი სეზონის დაწყებამდე განვაახლეთ სასტუმროს ტექნიკური ინფრასტრუქტურა. პარალელურად მიმდინარეობს ვაკანტური პოზიციების შევსება ახალი კადრებით და, შესაბამისად, მათი გადატრენინგება.

მომსახურების მიმართულებით დავამატეთ საზაფხულო სათავგადასავლო ტურები ტაბაწყურის მიმართულებით, რაც სტუმრებს საშუალებას აძლევს ზაფხულის სეზონი აქტიურად და შთამბეჭდავად გაატარონ“, - აცხადებს ნინა გაჩეჩილაძე.

Inn Hospitality-ს კომერციული დირექტორის განმარტებით, Bakuriani Inn-ის მაგალითზე ზაფხულის სეზონისთვის ჯავშნები საკმაოდ აქტიურად შედის. 

„რაც შეეხება წინასწარ ჯავშნებს და ფასებს მიმდინარე სეზონზე – ფასები უცვლელი რჩება ჩვენი სტუმრებისთვის, ხოლო ერთგული მომხმარებლებისთვის გთავაზობთ არაერთ სპეციალურ სააქციო შეთავაზებას.

როგორც ცნობილია, ბაკურიანის ერთ-ერთი ძირითადი აუდიტორია შიდა ბაზრის მომხმარებელია. უკვე არსებული ჯავშნებიდან გამომდინარე, შეგვიძლია ვთქვათ, რომ ეს ტენდენცია წარმატებით ნარჩუნდება 2025 წელსაც“, - ამბობს ნინა გაჩეჩილაძე.

 რაც შეეხება ზამთრის ტურისტულ სეზონს (2025–2026 წლები), Bakuriani Inn-ის წარმომადგენელი ამბობს, რომ გაყიდვები უკვე დაწყებულია. 

„მარკეტინგული კამპანიები ეტაპობრივად ვითარდება და, ტრადიციულად, აქტიურ ფაზაში აგვისტოს ბოლოს შევა“, - აცხადებს Inn Hospitality-ს კომერციული დირექტორი.