გლობალური არასტაბილურობის ფონზე ტურიზმის სექტორი ერთ-ერთ ყველაზე მოწყვლად დარგად რჩება, თუმცა ბაზრების დივერსიფიკაცია კომპანიებს განსხვავებულ მდგომარეობაში აყენებს, - აღნიშნულის შესახებ ტურიზმის ეროვნული ადმინისტრაციის ხელმძღვანელმა მაია ომიაძემ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას ისაუბრა. მისი თქმით, ნაწილი ოპერატორებისა, რომლებიც კონკრეტულ ბაზრებზე არიან დამოკიდებული, გამოწვევების წინაშე დგანან, მაშინ როცა სხვა კომპანიები ზაფხულის სეზონს აქტიურად ელოდებიან.

აღსანიშნავია, რომ დარგში არსებულ გამოწვევებზე და გეგმებზე სასაუბროდ მაია ომიაძე ტურიზმის სექტორის წარმომადგენლებს უკვე შეხვდა და მათგან დეტალური ინფორმაცია მოისმინა.

„ქართულ ტურიზმის სექტორში არსებული ვითარება შეგვიძლია ორ ნაწილად გავყოთ: ერთი მხრივ, ეს არის სამომავლო ტენდენციები და მოლოდინები, ხოლო მეორე მხრივ თავად სექტორის რეაქცია.

ბუნებრივია, სექტორის რეაქცია პირდაპირ კავშირშია მომხმარებლის ქცევასთან. მოგეხსენებათ, ნებისმიერი გლობალური თუ რეგიონული ტურბულენტობის დროს, პირველი, რაზეც ადამიანი ეკონომიას აკეთებს ან რის შეწყვეტასაც წყვეტს ფინანსური დაზოგვის მიზნით, სწორედ მოგზაურობა და ტურიზმია.

შესაბამისად, ტურიზმი რეალურად ყველაზე მოწყვლადი სექტორია. კიდევ ერთხელ ვიტყვი, რომ ბოლო ხუთი წლის განმავლობაში დარგი პერიოდულად ერთგვარ „რეანიმაციულ“ რეჟიმში იმყოფება.

დღეს სექტორში განწყობები არაერთგვაროვანია. შეხვედრებზე იყვნენ  ადამიანებს, რომლებიც ახლო აღმოსავლეთის ბაზარზე არ მუშაობენ, მათ საერთოდ არ აქვთ ჯავშნების გაუქმება და აქტიურად ემზადებიან ზაფხულის სეზონისთვის. ვინაიდან ბაზარი დივერსიფიცირებულია, ტურიზმის ინდუსტრია საკმაოდ ჭრელია და საფრთხის შეგრძნებაც ყველასთვის სხვადასხვანაირია. თუმცა, ბუნებრივია, სულ სხვა მდგომარეობაში არიან ის კომპანიები, რომლებიც მხოლოდ ისრაელის ან არაბთა გაერთიანებული საამიროების ბაზარზე იყვნენ ორიენტირებულნი“, - აცხადებს ომიაძე.

ტურიზმის ეროვნული ადმინისტრაციის ხელმძღვანელის განცხადებით, ტურისტული ბაზრის დივერსიფიკაციის პარალელურად მიმდინარეობს აქტიური მუშაობა ახალი მიმართულებების ათვისებაზე, მათ შორის შუა აზიის ქვეყნებში „როუდ შოუებისა“ და B2B შეხვედრების ორგანიზებაზე, რაც მიზნად ისახავს ახალი პარტნიორების მოზიდვასა და ბაზრის გაფართოებას. მისი თქმით, საქართველო საერთაშორისო ტურისტულ ბაზარზე მზარდი რეპუტაციით სარგებლობს, სადაც განსაკუთრებული მნიშვნელობა ენიჭება ქვეყნის უსაფრთხოების იმიჯს, როგორც ერთ-ერთ მთავარ გზავნილს.

„ევროპის ქვეყნებიდან, პოლონეთიდან, გერმანიიდან, ბრიტანეთიდან დიდი ოდენობით საკმაოდ მაღალი დონის  "ბაიერები" არიან ჩამოსულები. 

დღეს დარგის ერთ-ერთ გავლენიან ბიზნესმენთან მქონდა საუბარი და მან აღნიშნა, რომ საქართველოს რეპუტაცია საერთაშორისო ასპარეზზე თვიდან თვემდე სტაბილურად იზრდება.

მან განსაკუთრებული ხაზი გაუსვა ჩვენს მთავარ გზავნილს - უსაფრთხოებას. რა თქმა უნდა, მნიშვნელოვანია ჩვენი ტრადიციული სტუმართმასპინძლობა და სერვისების ხარისხი, თუმცა უსაფრთხოება არის ის უდიდესი მონაპოვარი, რომელსაც საქართველო მსოფლიოს სთავაზობს და რასაც საერთაშორისო თანამეგობრობა ძალიან აქტიურად და პოზიტიურად იღებს“, - აცხადებს მაია ომიაძე.