ტურიზმის ეროვნული ადმინისტრაციის ხელმძღვანელის მაია ომიაძის განცხადებით, საქართველოს ტურისტული სტრატეგია ორიენტირებულია მაღალმხარჯველუნარიანი ვიზიტორების მოზიდვაზე. როგორც  ტელეკომპანია „მაესტროს“ ეთერში გადაცემა Business Insider Georgia-ში სტუმრობისას მაია ომიაძემ განმარტა, ტურისტულ სექტორში არსებობენ კომპანიები, რომლებიც წლების განმავლობაში კონკრეტულ ბაზრებზე, მათ შორის გერმანიისა და აღმოსავლეთ ევროპის მიმართულებით, მუშაობენ, თუმცა ახალი ბაზრების ათვისებისკენ მიმართული ინიციატივები და საერთაშორისო გამოფენები ბიზნესს დამატებითი შესაძლებლობების შექმნისკენ  უბიძგებს.

„ჩვენ ყოველთვის ვთავაზობთ სექტორს ახალ ინიციატივებსა და მონაწილეობას საერთაშორისო გამოფენებში ახალ ბაზრებზე გასასვლელად. უნდა აღინიშნოს, რომ ბევრი კომპანია ამ შესაძლებლობებს აქტიურად იყენებს და მუდმივად სინჯავს ძალებს ახალ მიმართულებებზე.

როდესაც ინდოეთსა და ჩინეთში მარკეტინგული ღონისძიებები დავიწყეთ, გამოცდილი და ტრადიციულ ბაზრებზე მომუშავე მსხვილი კომპანიები ამ ახალ გამოწვევას სიამოვნებით დათანხმდნენ. ისინი ჩვენთან ერთად აქტიურად იწყებენ მუშაობას ახალ მიმართულებებზე, რადგან რეალურად სწორედ ამ ბაზრებშია მომავალი.

ინდოეთიდან და ჩინეთიდან მოგზაურთა ნაკადები გლობალურად იზრდება. დღეს მთელი მსოფლიო ცდილობს, ამ ქვეყნებიდან ტურისტების გარკვეული წილი მოიზიდოს. ამას კარგად ვაცნობიერებთ როგორც ჩვენ, სახელმწიფოს წარმომადგენლები, ისე კერძო სექტორიც - ეს პასუხისმგებლობა გაზიარებულია, რადგან ასეთი მასშტაბური შედეგების მიღწევა მხოლოდ ერთობლივი მუშაობითაა შესაძლებელი სხვაგვარად წარმატება წარმოუდგენელია.

ტურიზმის განვითარება ავიაციის გარეშე, ფაქტობრივად, წარმოუდგენელია. თუ ჩვენ ერთობლივად არ ვიმუშავეთ ახალი მიმართულებების ათვისებასა და სიხშირეების დამატებაზე, მხოლოდ კამპანიები სასურველ შედეგს ვერ მოიტანს.

სწორედ ამიტომ, ჩვენ არა მხოლოდ დამოუკიდებელ მარკეტინგულ კამპანიებს ვატარებთ სხვადასხვა ბაზარზე, არამედ ავიაკომპანიებთან ერთად ვახორციელებთ ერთობლივ აქტივობებსაც. ეს არის ძალიან ეფექტიანი ხელსაწყო, რათა ახალი საჰაერო მიმართულების დამატების შემთხვევაში, უზრუნველყოფილი იყოს მაღალი ცნობადობა და რეისების მაქსიმალური დატვირთულობა.

ტურიზმის ინდუსტრია და მასში ჩართული ბიზნესსექტორი საკმაოდ ჭრელია, სერვისები მრავალფეროვანია და, შესაბამისად, მიდგომებიც ბაზრებისა თუ მომსახურების სახეობების მიხედვით ძალიან ინდივიდუალურია.

ნამდვილად გიდასტურებთ, რომ მიმდინარე მსოფლიო მოვლენები მარტივი არ იქნება არც ჩვენთვის და არც ზოგადად ტურიზმის სექტორისთვის, თუმცა შემიძლია დარწმუნებით ვთქვა, რომ ამ პროცესს საქართველო შედარებით იოლად გადალახავს“, - განმარტავს მაია ომიაძე.