შიდა ტურიზმი საქართველოს ტურიზმის სექტორის ერთ-ერთი მნიშვნელოვანი მიმართულებაა და მისი განვითარების მიზნით მთელი წლის განმავლობაში სხვადასხვა ფესტივალი და სერვისების გაუმჯობესებაზე ორიენტირებული პროექტები ხორციელდება. აღნიშნულის შესახებ ტურიზმის ეროვნული ადმინისტრაციის ხელმძღვანელმა ტელეკომპანია „მაესტროს“ ეთერში გადაცემა Business Insider Georgia-ში სტუმრობისას ისაუბრა. მაია ომიაძის თქმით,

„შიდა ტურიზმი ჩვენი ერთ-ერთი უმნიშვნელოვანესი მიმართულებაა. ყოველწლიურად არაერთ ღონისძიებას ვახორციელებთ, იქნება ეს სხვადასხვა ფესტივალი თუ პროექტები სერვისების გაუმჯობესების თვალსაზრისით.

თუმცა, არის პერიოდები, როდესაც დამატებითი წამახალისებელი აქტივობები განსაკუთრებით გვჭირდება. ამის საუკეთესო მაგალითი პანდემიის პერიოდი იყო. სწორედ შიდა მოგზაურებმა გადაარჩინეს მაშინ ქართული ტურიზმი.

კამპანიები „იმოგზაურე საქართველოში“ და „აღმოაჩინე ის, რაც შენია“ სამოქალაქო საზოგადოებამ მყისიერად აიტაცა. იმ პერიოდში მთელი ქვეყანა ახალი ადგილების აღმოჩენის პროცესში აქტიურად ჩაერთო და, ალბათ, თითოეულმა ჩვენგანმა მინიმუმ ერთი ახალი ლოკაცია მაინც აღმოვაჩინეთ.

ამ აქტივობამ რეალურად გადამწყვეტი როლი ითამაშა სექტორის სიცოცხლისუნარიანობის შენარჩუნებაში. ახლაც მიგვაჩნია, რომ ის გარკვეულ წილად დაეხმარება სექტორს არსებული გამოწვევების დაბალანსებაში.

მოგეხსენებათ, იწყება ჩვენი ერთ-ერთი ყველაზე პოპულარული ფესტივალის, „გემო ფესტის“ ახალი სეზონი, რომელიც სხვადასხვა რეგიონს მოიცავს. ამასთანავე, ვგეგმავთ დამატებით ღონისძიებებს, რაზეც კერძო სექტორთან ერთად უკვე ვიმსჯელეთ. შეხვედრას ესწრებოდნენ არა მხოლოდ ტურისტული კომპანიებისა და გიდების, არამედ მსხვილი, საშუალო და მცირე სასტუმროების წარმომადგენლებიც.

მჯერა, რომ ასეთი კოორდინირებული ძალისხმევით შევძლებთ, მიმდინარე წელი საკმაოდ წარმატებულად დავასრულოთ“, - აცხადებს მაია ომიაძე.