სექტორის მოლოდინები მიმდინარე ზაფხულის ტურისტულ სეზონთან დაკავშირებით გამართლდა

ტურიზმი

სექტორის მოლოდინები მიმდინარე ზაფხულის ტურისტულ სეზონთან დაკავშირებით გამართლდა - ნატა კვაჭანტირაძე

16.09.2025.12:00

სექტორის მოლოდინები მიმდინარე ზაფხულის ტურისტულ სეზონთან დაკავშირებით გამართლდა, - ამის შესახებ Business Insider Georgia-სთან საქართველოს ტურიზმის ასოციაციის თავმჯდომარემ, ნატა კვაჭანტირაძემ განაცხადა. მისი თქმით, არსებობს მოლოდინი, რომ დადებითი ტენდენცია გაგრძელდება სექტემბერ-ოქტომბერის პერიოდშიც.

„მოლოდინები, რომელიც სექტორს ქონდა მიმდინარე სეზონთან მიმართებაში გამართლდა. აგვისტო იყო განსაკუთრებით აქტიური როგორც ევროპელი ტურისტების, ასევე აღმოსავლეთიდან ჩამოსული ვიზიტორების თვალსაზრისით. განსაკუთრებული აქტივობა შეინიშნებოდა რეგიონებში, რაც ძალიან მისასალმებელია. აგვისტოს განმავლობაში ისინი საგრძნობლად გააქტიურდნენ.
სეზონი ჯერ დასრულებული არ არის, თუმცა მოლოდინი გვაქვს, რომ სექტემბერ-ოქტომბრის პერიოდშიც შენარჩუნდება ეს პოზიტიური ტენდენცია.
ვიმედოვნებთ, რომ კვარტალურ ჭრილში გამოქვეყნებული სტატისტიკური მონაცემები იქნება ძალიან დამაკმაყოფილებელი. ეს ინფორმაცია კი ბიზნესს საშუალებას მისცემს, დაგეგმოს სამომავლო საქმიანობა.
ნებისმიერი შედეგი წარმოადგენს იმ წინაპირობას, თუ როგორ და რა მიმართულებით უნდა გააქტიურდეს ჩვენი კერძო სექტორი საერთაშორისო ბაზრებზე,“ - განაცხადა ნატა კვაჭანტირაძემ.

შეგახსენებთ, რომ საქართველოში უცხოელი ტურისტების იანვარ-სექტემბრის მაჩვენებლები და უშუალოდ მესამე კვარტლის სტატისტიკა ოფიციალურად 2025 წლის ოქტომბერში გამოქვეყნდება. ეს მონაცემები ნათლად ასახავს, რამდენად აქტიური იყო საერთაშორისო ვიზიტორების ნაკადი ზაფხულის ტურისტული სეზონის განმავლობაში.