სასტუმროს დატვირთულობამ პირველ კვარტალში რეკორდულ, 97%-ს მიაღწია - სალომე კვარაცხელია

ტურიზმი

ტურიზმის ეროვნული ადმინისტრაციის აქტივობები გვაძლევს შესაძლებლობას, ტურისტული ნაკადების ზრდა შევინარჩუნოთ - შალვა ხუციშვილი

15.04.2026.17:26

2026 წლის პირველი კვარტალი საქართველოს ტურიზმისთვის ახალი რეკორდით აღინიშნა: იანვარ-მარტის პერიოდში ქვეყანაში 1 მილიონი ტურისტული ვიზიტი შედგა, რაც წინა წლის ანალოგიურ პერიოდთან შედარებით, 4%-იანი ზრდაა. ტურიზმის ეროვნული ადმინისტრაციის მონაცემებით, განსაკუთრებით მაღალი აქტივობა ევროკავშირის ქვეყნებიდან და დიდი ბრიტანეთიდან დაფიქსირდა, სადაც ვიზიტების რაოდენობა, 2025 წლის ანალოგიურ პერიოდთან შედარებით, 30.2%-ით გაიზარდა.

ტურისტული კომპანია „Georgian Bus“-ის დირექტორის, შალვა ხუციშვილის შეფასებით, წლის დასაწყისი კერძო სექტორისთვისაც პოზიტიური ტენდენციებით დაიწყო, მისი თქმით, იანვარ-თებერვალში განსაკუთრებით აქტიური იყო ისრაელის ბაზარი, რაც ზრდის ერთ-ერთი მნიშვნელოვანი ფაქტორი გახდა. თუმცა გლობალურმა პროცესებმა მარტის თვეში სექტორზე გარკვეული გავლენა იქონია.

მისივე შეფასებით, მიუხედავად გლობალური გამოწვევებისა, სექტორში პოზიტიური მოლოდინები კვლავ შენარჩუნებულია და არსებული ტენდენციის აღდგენის პერსპექტივა რეალურია.

„ტურისტების მოზიდვაში ძალიან გვეხმარება ტურიზმის ეროვნული ადმინისტრაციის ღონისძიებები, იქნება ეს B2B შეხვედრები თუ ჩვენს მიზნობრივ ბაზრებზე სხვადასხვა მარკეტინგული კამპანია, რაც საშუალებას გვაძლევს, უფრო ფართოდ წარმოვაჩინოთ საქართველო და მოვიზიდოთ მეტი ტურისტი, რაც საბოლოოდ ამ დადებითი ტენდენციის შენარჩუნებასა და გაუმჯობესებას უწყობს ხელს,“ - აცხადებს შალვა ხუციშვილი.