საქართველოსა და სერბეთს შორის პირდაპირი ავიამიმოსვლის დაწყება ქართულ-სერბულ ურთიერთობებს კიდევ უფრო დაახლოებს, - აცხადებს სერბეთის საშინაო და საგარეო ვაჭრობის მინისტრი იაგოდა ლაზარევიჩი. 

მისი განცხადებით ორ ქვეყანას შორის ბიზნეს ურთიერთობებსაც შეუწყობს ხელს. 

,,ძალიან მნიშვნელოვანი დღეა. დღევანდელი ფრენა ქართულ-სერბულ ურთიერთობებს კიდევ უფრო დაახლოებს. პატივი მაქვს ეს სასიხარულო ამბავი პირადად აღმენიშნა თბილისში. ველით ბევრ ტურისტს სერბეთიდან საქართველოში და პირიქით. ეს ფრენა ორ ქვეყანას შორის ბიზნეს ურთიერთობებსაც შეუწყობს ხელს", - განაცხადა სერბეთის საშინაო და საგარეო ვაჭრობის მინისტრმა იაგოდა ლაზარევიჩიმა. 

შეგახსენებთ, რომ საქართველოს ავიაბაზარზე, ახალი ევროპული ავიაკომპანია Air Serbia შემოვიდა. აქტიური მოლაპარაკებები საქართველოს აეროპორტების გაერთიანებამ სერბეთის ფლაგმანთან, ეკონომიკისა და მდგრადი განვითარების სამინისტროს ჩართულობით, წარმატებით დაასრულა. ავიაკომპანია თბილისის მიმართულებით და პირიქით პირდაპირ რეგულარულ რეისებს კვირაში 3 სიხშირით, Airbus 319-ით შეასრულებს.
თბილისის საერთაშორისო აეროპორტში ბელგრადიდან პირველი პირდაპირი რეისი Air Serbia-მ ცოტა ხნის წინ შეასრულა. პირველი რეისის მგზავრებს შორის სერბეთის ვაჭრობის მინისტრი იაგოდა ლაზარევიჩი, რომლესაც თბილისის საერთაშორისო აეროპორტის სამთავრობო ტერმინალში საგარეო საქმეთა მინისტრის მოადგილე ალექსანდრე ხვთისიშვილი, საქართველოს აეროპორტების გაერთიანების გენერალური დირექტორი ლევან მოსეშვილი და საქართველოსა და სომხეთში სერბეთის ელჩი ტატიანა პანაიუტოვიჩ ცვეტკოვიჩი დახვდნენ.