შანხაიდან პირდაპირი რეისების დამატების შემდეგ ჩინეთიდან ვიზიტები გასამმაგდა, - ამის შესახებ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას კომპანია HSC Group Hospitality-ის დირექტორმა, გიორგი დოლიძემ განაცხადა.

„ძალიან მიხარია ხოლმე, როდესაც ოფიციალური სტატისტიკა ემთხვევა კერძო სექტორში არსებულ განწყობას. კერძო სექტორის ბიზნესი ფეხს უწყობს სტატისტიკას და პირიქით. ეს ერთმანეთთან კავშირი ძალიან დამაიმედებელია და კიდევ ერთხელ აჩვენებს იმას, თუ რამდენად მნიშვნელოვანი არის ტურიზმი და ტურიზმის წილი საქართველოს ეკონომიკაში, მის მშპ-ში, სადაც დაახლოებით 7-დან 8%-მდე და, შეიძლება, 10%-მდე წილიც კი ეკავოს მთლიანობაში. ბოლო წლებში ჩვენ ვხედავთ, თუ რამხელა როლი აქვს ტურიზმიდან მიღებულ შემოსავლებსა და დოვლათს საქართველოს ეკონომიკის მდგრადად განვითარებაში, რაც ძალიან გასახარია თითოეული ჩვენი მოქალაქისა და ჩვენი სექტორის წარმომადგენლებისთვის.

როგორც აღნიშნეთ, ფაქტობრივად, დავამთავრეთ ის 9 თვე, რომელიც, როგორც ხშირად აღვნიშნავდი, საკმაოდ წარმატებული იყო ჩვენთვის. თბილისის მასშტაბით, როდესაც ოპერირება დავიწყეთ, უკვე მაღალი სეზონის კვალდაკვალ, ეს იყო მარტის 20-დან, ფაქტობრივად, აპრილის დასაწყისამდე, გადავინაცვლეთ მაღალი სეზონის ნიშნულებზე.

თბილისის მაღალი სეზონი გახანგრძლივებულია. როგორც ვთქვით, დღესაც, მიუხედავად იმისა, რომ უკვე ოქტომბრის შუა რიცხვებია, მაინც მაღალი სეზონის დატვირთულობის ქვეშ ვიმყოფებით, რამაც აპრილიდან მოყოლებული დღემდე 95% შეადგინა, რაც ძალიან საამაყო და დამაიმედებელი ნიშნულია.

არანაკლები იყო ბათუმის მიმართულება ივნისიდან აგვისტოს ბოლომდე, როდესაც დატვირთულობა პიკში იყო შესული. ჩვენ გავხსენით ამ წელს 795 ნომრიანი Apart Hotel-ი, სადაც 80%-90%-იანი დატვირთულობა, მოგეხსენებათ, რა მოცულობასთან არის დაკავშირებული და რამდენად სასიხარულოა როგორც ზოგადად ინვესტორებისთვის, ასევე იმ ადამიანებისთვის, ვისაც ამ Apart Hotel-ის თითოეული აპარტამენტი საინვესტიციო მიზნებისთვის აქვთ ნაყიდი.

ვფიქრობ, რომ 2026 წელი 2025 წელს, ჩემი ვარაუდითა და გათვლით, მინიმუმ 8-10%-ით გადაასწრებს როგორც შემოსავლების, ისე ტურისტების შემოდინების რიცხობრივი მაჩვენებლების თვალსაზრისით. აუცილებლად გადავაჭარბებთ 5 მილიარდ დოლარს შემოსავლის მხრივ. ამის იმედს ის დამაჯერებელი გარემოებები გვაძლევს, თუნდაც პირველი სამი კვარტლის შეფასება და ის წინასწარ გაკეთებული რეზერვაციები, რომლებიც 2026 წლის 31 დეკემბრის ჩათვლით არის წარმოდგენილი ჩვენთან და ჩვენს ირგვლივ“, - აცხადებს გიორგი დოლიძე.