საქართველოს ავიაბაზარზე Norwegian-ის შემოსვლას საკმაოდ დადებითი შედეგები ექნება, ვინაიდან ნებისმიერი პირდაპირი მიმართულების დამატება თავისთავად იწვევს სტუმრების მოზიდვას ამ ქვეყნებიდან და ამის მაგალითრბი სახეზეა მთელი წლის განმავლობაში, - აცხადებს მენეჯმენტ კომპანია McInerney Hospitality International-ის ვიცე-პრეზიდენტი მაია წერეთელი.

მისივე განმარტებით, გარდა შემომყვანი ტურიზმისა, ბაზარზე სკანდინავიური ავიაკომპანიის შემოსვლა მნიშვნელოვანი იქნება გამყვანი ტურიზმის კუთხითაც.

„საქართველოდან ძალიან ბევრ ქართველს მიეცემა ისეთი ქალაქის მონახულების საშუალება, როგორიც არის კოპენჰაგენი. დარწმუნებით შემიძლია გითხრათ, რომ ბოლო პერიოდში, რაც კი რომელიმე ევროპის ქვეყანაში ვიმოგზაურე, უმეტეს შემთხვევაში ადამიანების უმეტესობამ დააფიქსირა სურვილი თბილისის და ბათუმის მონახულების. ეს კი სავარაუდოდ გამოიწვია სწორ ბაზრებზე რეკლამებმა და ასევე საერთაშორისო გამოფენებმა, რომლებშიც ჩვენ ტურიზმის ეროვნულ ადმინისტრაციასთან ერთად აქტიურად ვმონაწილეობთ როგორც სასტუმროების მიმართულებით, ისე ტურისტული სააგენტოების კუთხით - რეალურად გამოფენებში მონაწილეობით შევძელით ბევრი ადამიანისთვის გაგვეცნო საქართველო. შესაბამისად, ახალი ავიაკომპანიის შემოსვლა როგორც ჩვენთან ჩამოსვლელი ტურისტების რაოდენობის თვალსაზრისით იქნება საინტერესო, ასევე მნიშვნელოვანია ის საქართველოს მოქალაქეებისთვის მოგზაურობის კუთხით“, - განმარტავს მაია წერეთელი.

McInerney Hospitality International-ის ვიცე-პრეზიდენტის განმარტებით, ახალი ავიაკომპანიის შემოსვლის შემდეგ ბიზნესმა ბევრი უნდა იმუშაოს, რათა ორმხრივი ხელშეკრულებები გააფორმოს და რაც შეიძლება მეტი ტურისტი დააინტერესოს.

„ცხადია, ახლა უკვე მნიშვნელოვანია, რომ კომპანიებს შორის მოხდეს ორმხრივი ხელშეკრულებების გაფორმება სტუმრების გაცვლაზე და ვიზიტების დაგეგმვაზე. ჩვენ, სასტუმროების მხრიდან, შეგვიძლია მათ საკმაოდ კარგი ფასები შევთავაზოთ, განსაკუთრებული შეთავაზებები გავუკეთოთ სკანდინავიის ქვეყნებიდან მოზიდულ სტუმრებს. ბევეი სამუშაო იქნება დასაგეგმი როგორც შემომყვანი, ისე გამყვანი ტუროპერატორების მხრიდან. შესაბამისად, ვფიქრობ, რომ სამუშაო ბევრი გვაქვს, თუმცა კარგ შედეგებსაც დაველოდებით“, - განმარტავს McInerney Hospitality International-ის ვიცე-პრეზიდენტი.

შეგახსენებთ, რომ 2026 წლის 27 ივნისიდან საქართველოს ავიაბაზარზე ოპერირებას ევროპული ავიაკომპანია Norwegian იწყებს.

Norwegian კოპენჰაგენი–თბილისი–კოპენჰაგენის მიმართულებით პირდაპირი რეგულარული რეისები დანიის სამეფოსა და საქართველოს დედაქალაქებს შორის კვირაში ორჯერ შესრულდება.

ერთ-ერთი წამყვანი ევროპული ავიაკომპანიის საქართველოს ბაზარზე შემოსვლა კიდევ ერთხელ უსვამს ხაზს საქართველოს წარმატებულ საავიაციო პოლიტიკას, მათ შორის ბაზრების დივერსიფიკაციის მიმართულებით, ასევე ტურიზმის ინდუსტრიის განვითარების მზარდ დინამიკას და ქვეყნის სწორ პოზიციონირებას საერთაშორისო ბაზრებზე.

როგორც ეკონომიკისა და მდგრადი განვითარების სამინისტროს მიერ გავრცელებულ ინფორმაციაშია აღნიშნული, სკანდინავიის ქვეყნები ეკონომიკისა და მდგრადი განვითარების სამინისტროსთვის ერთ-ერთი მნიშვნელოვანი სამიზნე ბაზარია ავიაციისა და ტურიზმის სექტორების განვითარების პროცესში. თბილისსა და კოპენჰაგენს შორის პირდაპირი რეგულარული საჰაერო მიმოსვლა მნიშვნელოვნად გაზრდის ამ მიმართულებით დაკავშირებადობას, რაც თავის მხრივ დადებითად აისახება საქართველოში მაღალმსყიდველუნარიანი ტურისტების მოზიდვასა და შესაბამისად, ტურიზმის სექტორიდან შემოსავლების ზრდაზე.

აღსანიშნავია, რომ აქამდე ორ დედაქალაქს შორის პირდაპირი რეგულარული ავიამიმოსვლა არასდროს ყოფილა, საქართველოს პირდაპირი საჰაერო გზით კოპენჰაგენთან ქუთაისის საერთაშორისო აეროპორტი აკავშირებდა.