British Airways-ი თბილისი-ლონდონი-თბილისის მიმართულებით ფრენებს 31 მარტიდან იწყებს. პირდაპირი რეგულარული ავიარეისები თბილისის საერთაშორისო აეროპორტსა და ჰითროუს აეროპორტს შორის კვირაში ოთხჯერ შესრულდება. ფრენების ოფიციალურად დაწყებამდე ექსკლუზიურად Business Insider Georgia რეიჩელ რაილს, British Airways-ის ქსელის განვითარების დირექტორს ესაუბრა.

რა სტრატეგიულმა და ბაზრის ანალიზის შედეგად გამოკვეთილმა ფაქტორებმა მოახდინა გავლენა British Airways-ის გადაწყვეტილებაზე შემოსულიყო ქართულ ბაზარზე? რა იყო ამ გადაწყვეტილების მიღების ძირითადი კრიტერიუმები? რა პერიოდის განმავლობაში აფასებდა British Airways-ი საქართველოს ბაზარს, სანამ გადაწყვეტდა ოპერირების დაწყებას?

ჩვენ ვმუშაობდით თბილისის მიმართულებით სერვისის გაშვების შესაძლებლობაზე რამდენიმე თვის განმავლობაში და მოხარულნი ვართ, რომ ვიქნებით პირველი ავიაკომპანია, რომელმაც განაახლა პირდაპირი მომსახურება დიდ ბრიტანეთსა და საქართველოს შორის. დავინახეთ, რომ არსებობდა საინტერესო პოტენციური შესაძლებლობა British Airways-ისთვის, განსაკუთრებით გაერთიანებულ სამეფოსთან პირდაპირი რეისების არარსებობა. ამას დაემატა ბაზრის ცოდნა და მხარდაჭერა საქართველოში ჩვენი პარტნიორების მხრიდან, რაც იმას ნიშნავდა, რომ ახლა იყო შესაფერისი დრო 12 წლის შემდეგ მომსახურების განახლებისთვის.

მიუხედავად იმისა, რომ საქართველო შედარებით მცირე ბაზარია British Airways-ისთვის, მას აქვს მნიშვნელოვანი ზრდის პოტენციალი. როგორ აფასებთ საქართველოს მიმზიდველობას, ბრიტანელი ტურისტების თვალსაზრისით?

ჩვენ ვამაყობთ, რომ ვართ პირველი ავიაკომპანია, რომელმაც აღადგინა პირდაპირი კავშირი დიდ ბრიტანეთსა და საქართველოს შორის კვირაში ოთხი რეისით და ერთადერთი პრემიუმ ბრიტანული ავიაკომპანია, რომელიც გთავაზობთ ამ შესაძლებლობას. ჩვენ ველით მრავალფეროვან მომხმარებლებს, მაგრამ განსაკუთრებით გვჯერა, რომ ბრიტანელი მოგზაურები დატკბებიან საქართველოს კულტურით, ბუნებრივი სილამაზით და, რა თქმა უნდა, შესანიშნავი ღვინით.

რა ნაბიჯები შეიძლება გადადგას საქართველომ დიდი ბრიტანეთის მოგზაურთათვის მიმზიდველობის გასაძლიერებლად?

ჩვენ ვნახეთ ba.com-ზე ლონდონიდან თბილისის მიმართულებით ფრენების ძიების სტაბილური ზრდა, რაც დამაიმედებელია. ვიცით, რომ საქართველოს აქვს მდიდარი ისტორია და გვთავაზობს ულამაზეს პეიზაჟებს, სტუმართმოყვარეობას და, რა თქმა უნდა, შესანიშნავ ღვინოს. მოხარული ვართ, რომ ჩვენს წვლილს შევიტანთ რომ ეს ადგილი  უფრო ხელმისაწვდომი დანიშნულება გახდეს მომხმარებლებისთვის, რომლებსაც სურთ განიცადონ ახალი თავგადასავალი.

British Airways-ის კოდის გაზიარების ხელშეკრულებები  და მისი არსებული ფრენების განრიგი მგზავრებს შესაძლებლობას აძლევს აშშ-ში შედარებით მოკლე დროში მოხვდნენ. რა კონკრეტულ შესაძლებლობას სთავაზობს მოგზაურებს ეს მარშრუტი?

ჩვენ მოვახდინეთ ფრენების დროის ოპტიმიზაცია იმ მომხმარებლებისთვის, რომლებსაც სურთ დაუკავშირდნენ სხვა ლოკაციებს ლონდონის ჰითროუდან, განსაკუთრებით ნიუ-იორკიდან, სან-ფრანცისკოს და გაერთიანებული სამეფოდან ევროპის მიმართულებებს, რომლებსაც უშუალოდ საქართველოდან არ ემსახურებიან, როგორიცაა ედინბურგი და მადრიდი. ჩვენ გავაუმჯობესეთ ეს დრო, რათა უზრუნველვყოთ ჩვენს მომხმარებლებს ჰქონდეთ მოქნილობა შემდგომი მოგზაურობისთვის.