აეროპორტების საერთაშორისო საბჭომ (ACI) თბილისის საერთაშორისო აეროპორტი ევროპის მასშტაბით 5 კატეგორიაში დააჯილდოვა. ჯილდოები თბილისის საერთაშორისო აეროპორტს 5 მილიონამდე მგზავრთნაკადის მქონე აეროპორტებს შორის, მიენიჭა, სადაც კონკურენცია განსაკუთრებით მაღალია.

საქართველოს აეროპორტების გაერთიანების გენერალური დირექტორის, ლევან მოსეშვილის შეფასებით, Airports Council International-ის (ACI) მიერ თბილისის საერთაშორისო აეროპორტის ევროპის მასშტაბით 5 კატეგორიაში დაჯილდოება მნიშვნელოვანი აღიარებაა როგორც თავად აეროპორტისთვის, ისე მთლიანად ქვეყნის საავიაციო სექტორისთვის.

„Airports Council International-ის მიერ მინიჭებული 5 ჯილდო არის მნიშვნელოვანი საერთაშორისო აღიარება, რომელიც ადასტურებს, რომ თბილისის საერთაშორისო აეროპორტი მგზავრთა მომსახურების ხარისხით ევროპის მოწინავე აეროპორტებს შორისაა.
განსაკუთრებით მნიშვნელოვანია, რომ ეს შედეგი მიღწეულია თბილისისა და ბათუმის საერთაშორისო აეროპორტების ოპერატორი კომპანიის TAV Georgia-ს მენეჯმენტის პირობებში და Groupe ADP-ის საერთაშორისო გამოცდილებისა და მხარდაჭერის ფარგლებში. მათი ჩართულობა უზრუნველყოფს თანამედროვე მართვის სტანდარტებს, ინოვაციურ მიდგომებსა და ინფრასტრუქტურის უწყვეტ განვითარებას,-‘’განაცხადა ლევან მოსეშვილმა.

აეროპორტების გაერთიანების გენერალური დირექტორის შეფასებით, 6 კატეგორიიდან 5-ში აღიარების მოპოვება ნიშნავს, რომ შოთა რუსთაველის სახელობის აეროპორტი იცავს საერთაშორისო სტანდარტებსა და მაღალ ხარისხს უსაფრთხოებისა და მგზავრთა კმაყოფილების კუთხით.

მადლობას ვუხდი თითოეულ თანამშრომელს, პარტნიორ კომპანიებს, პირველ რიგში TAV Georgia-სა და Groupe ADP-ს, ასევე ჩვენს მგზავრებს ნდობისთვის. ეს წარმატება საერთო ძალისხმევის შედეგია და საქართველოს საავიაციო სექტორის საერთაშორისო პოზიციების გაძლიერებას ემსახურება,-‘’განაცხადა ლევან მოსეშვილმა.

2025 წელს ACI-მ საუკეთესო შედეგების მქონე აეროპორტები 6 კატეგორიაში დაასახელა, ხოლო თბილისის საერთაშორისო აეროპორტმა 6-დან 5-ში მოიპოვა აღიარება, რაცმომსახურების ხარისხის, ოპერაციული ეფექტიანობისა და მგზავრთა კმაყოფილების მაღალ დონეზე მიუთითებს.