HSC Group Hospitality-ის დირექტორის, გიორგი დოლიძის განცხადებით, 2026 წლისთვის კომპანია პოზიტიურ მოლოდინებს ინარჩუნებს. HSC Group Hospitality ქვეყნის მასშტაბით რამდენიმე განთავსების ობიექტს მართავს, მათ შორის თბილისის ცენტრში მდებარე Glaros Old Town-ს.

როგორც ტელეკომპანია „მაესტროს“ ეთერში, გადაცემა Business Insider Georgia-ში სტუმრობისას გიორგი დოლიძემ აღნიშნა, სექტორის ზრდის სცენარი დამოკიდებულია გლობალურ და რეგიონულ ვითარებაზე, მათ შორის ახლო აღმოსავლეთში მიმდინარე დაძაბულობებზე, რაც მოკლევადიან და გრძელვადიან პერიოდში განსხვავებულ გავლენას ახდენს ტურისტულ ნაკადებზე. HSC Group Hospitality-ის დირექტორის განმარტებით, მსგავსი გამოწვევების წინაშე კომპანია და ზოგადად სექტორი წარსულშიც დადგა, თუმცა ბაზარი სწრაფად აღდგა, მათ შორის სეზონურობის და ბაზრების დივერსიფიკაციის წყალობით.

„დავიწყოთ იქიდან, რომ 2026 წელს მოლოდინი გვქონდა საკმაოდ დადებითი და, გამომდინარე იმ რეკორდული წლისგან, როგორიც იყო 2025, ვფიქრობდით და დღესაც მაქვს იმედი, რომ დაახლოებით 5-დან 10%-მდე გადააჭარბებს 2026-ის მაჩვენებლები 2025 წლის ციფრებს. პოზიტიური დაშვება გვაქვს, ოღონდ ეს დაშვება დამოკიდებულია, რა თქმა უნდა, იმ ვარაუდს და ყოველდღიურ სიახლეებზე, რაც შეიძლება წავიდეს იქითკენ, რომ მარტის თვეს შემოიფარგლოს ახლო აღმოსავლეთის დაძაბულობა. არის ორი სცენარი - გრძელვადიანი და მოკლევადიანი პერიოდი. რა თქმა უნდა, მოკლევადიანი პერიოდის შემდეგ, თავისთავად, ჩვენ ეს პრაქტიკა შარშანაც გამოვცადეთ, როდესაც ისრაელის ირგვლივ ვითარდებოდა სხვადასხვა სახის დაძაბულობები და ეს აღდგა დაახლოებით ორიდან სამ კვირაში და ეს მოხდა შუა სეზონზე, მაღალ სეზონზე. გვქონდა, ასე ვთქვათ, ივნისის თვე, ახლა გვაქვს დაბალი სეზონი - ისეთი ნეგატიური გავლენა მაშინაც არ ჰქონია, გამომდინარე იქიდან, რომ როდესაც იყო მაღალი სეზონი, სხვადასხვა ბაზრები იყო ძალიან დივერსიფიცირებული და სხვადასხვა რეზერვაციები აჭარბებდა. კრიტიკული გავლენა ისეთი, როგორიც წელს, ასე ვთქვათ, გლობალურად შარშან არ ჰქონიათ, თუმცა შარშანვე მალევე აღდგა“, - აღნიშნა გიორგი დოლიძემ.

HSC Group Hospitality-ის დირექტორის განცხადებით, ტურიზმის სექტორი გეოპოლიტიკური დაძაბულობების მიმართ ერთ-ერთი ყველაზე მოწყვლადი სფეროა და მსგავსი ვითარებების დროს პირველ რიგში სწორედ ამ მიმართულებაზე აისახება ნეგატიური ეფექტი. მისი თქმით, მიმდინარე წელს, მარტის მონაცემებით, კომპანიას დაახლოებით 50%-მდე გაუუქმდა რეზერვაციები, რომლებიც კონკრეტული ბაზრებიდან იყო მიღებული, რაც გლობალური ვითარებით არის განპირობებული.

„ჩვენ ვიცით, რომ ისრაელი და საამიროები არის ჩვენთვის სტატისტიკაში ერთ-ერთი პირველ და მეორე ადგილას მყოფი მიმართულებები, საიდანაც ძალიან მასიური რაოდენობით შემოდის საქართველოში ტურისტები. შესაბამისად, ამას ამწვავებდა კიდევ ის ფაქტი, რომ მარტსა და აპრილში დაემთხვა საამიროების მხარეს დღესასწაული - რამადანი და ისრაელის მხარეს პასექი, სადაც განსაკუთრებით გამოირჩეოდნენ ხოლმე ქვეყნიდან გასვლით, ჩვენთან ჩამოსვლით და ჩვენთვის ფაქტობრივად მარტის ბოლო და აპრილის მთლიანი პერიოდი არის და უნდა ყოფილიყო მაღალი სეზონი“, - აღნიშნა გიორგი დოლიძემ.

გიორგი დოლიძის თქმით, ის ბაზრები, რომლებიც დაბალ სეზონზე მნიშვნელოვან ტურისტულ ნაკადს ქმნიდნენ, კომპანიას მაღალი სეზონის ეფექტის შენარჩუნებაში ეხმარებოდა, რაც ფასების საშუალოზე მაღალ ნიშნულზეც აისახებოდა. მისი განმარტებით, მარტის შუა რიცხვებამდე, დაახლოებით 15-18 რიცხვამდე, ბაზარზე ერთგვარი „შოკური ეფექტი“ დაფიქსირდა, რის შემდეგაც სექტორის წარმომადგენლებსა და კომპანიებში დაიწყო მსჯელობა, თუ რა გზებით იყო შესაძლებელი ვითარების დაბალანსება და ზარალის შემცირება.

„საბედნიეროდ გვაქვს საკმაოდ დივერსიფიცირებული ბაზრები, გვაქვს ამდენი პირდაპირი ფრენა ევროპიდან, ჩინეთიდან, სხვადასხვა მიმართულებებიდან, საიდანაც შეიძლება, რომ ეს ყველაფერი, რა თქმა უნდა, შეივსოს. ასევე აღსანიშნავია, რომ წლიდან წლამდე აღნიშნული მიმართულებები არის მზარდი, თუმცა რადიკალურად და უცბად კრიტიკულ გადაწყობას სჭირდება შესაბამისი დრო. ერთ დღეში და ორ დღეში მსგავსი ტიპის მანიპულაცია თავისთავად ვერ მოხდება. ჩვენც დაგვჭირდა დაახლოებით ორიდან სამ კვირამდე, რომ უფრო სწორი და კარგი სტრატეგიული ნაბიჯები გადაგვედგა - იქნებოდა ეს სხვადასხვა ბაზრებზე უფრო მეტი მარკეტინგული აქტივობის ჩართვა, უფრო შედარებით დაბალბიუჯეტიანი ფასების შეთავაზება და ამ ყველაფრის კორექტირების წყალობით ბოლო რამდენიმე დღე დაახლოებით 80-100%-ზე ვმუშაობთ და იმედი მაქვს, რომ ესეც გაგრძელდება და, ვთქვათ, მარტის ბოლომდე დაიკეტება ომის საზღვრები, მორჩება ეს ვითარება და აპრილიდან სტანდარტულ პირობებში შევუდგებით ოპერირებას, იმიტომ რომ ძალიან მნიშვნელოვანია 2026 წლისთვის, რომ აპრილიდანვე ჩვენ გასული წლის ანალოგიურ პერიოდში მარტში გვქონდა დაახლოებით 70%-იანი, ხოლო აპრილში 92%-იანი დატვირთულობა.

იმ შემთხვევაში, თუ თბილისის ერთ-ერთ სასტუმროში არის მსგავსი მაჩვენებლები, შესაბამისად ლოგიკურია, რომ სხვადასხვა ობიექტებიც მეტ-ნაკლებად იმავენაირად იყვნენ დატვირთული. აქედან გამომდინარე, 2026-ს ძალიან დიდი პოტენციალი აქვს, რომ გადააჭარბოს 2025-ის მონაცემებს. რა თქმა უნდა, მარტი რომ შევადაროთ 2025-ის მარტს, თავისთავად ვერ გადააჭარბებს. ამას ვაცნობიერებთ, გვესმის და ვიაზრებთ, თუმცა იმ იმედს მაინც ვიტოვებ, რომ თუნდაც დაბალი, შედარებით დაკორექტირებული ფასებით, აპრილში მაინც არ დავკარგავთ იმ რეზერვაციებს, იმიტომ რომ ახლა არის სწორედ ის პერიოდი, როცა თითოეული ჯავშანი, თითოეული ადამიანის ჩამოსვლა არის ჩვენთვის ძალიან მნიშვნელოვანი.

უახლოეს პერიოდში უკვე ვიცით, რომ ევროპის, ჩინეთის და სხვადასხვა მიმართულებების, ასევე ჩვენი მეზობელი ქვეყნების მიმართულებით გვაქვს იმედი. განსაკუთრებით ევროპასთან ერთად, იმიტომ რომ აპრილ-მაისიდან უკვე ისინიც აქტიურად იწყებენ მოგზაურობას. სწორედ რადგანაც ეს მოხდა დაბალ სეზონზე. დაბალ სეზონზე უფრო მეტად ისრაელი და საამიროები გვამარაგებდა ტურისტული ვიზიტებით და შესაბამისად, როდესაც ეს მიმართულებები ჩაიკეტა, დარჩა ის ორ-სამ კვირიანი პერიოდი ძალიან დიდი დანაკარგებისა და გაუქმებების წინაშე“, - აღნიშნა HSC Group Hospitality-ის დირექტორმა.